छोट्या पडद्यावरील लोकप्रिय अभिनेता सिद्धार्थ वेणुगोपाल यांचे निधन झाले असून त्यांच्या जाण्याने मनोरंजन क्षेत्रात शोककळा पसरली आहे. गेल्या दोन वर्षांपासून ते कॅन्सरशी झुंज देत होते. मात्र, अखेर हा दीर्घ आणि कठीण लढा ते हरले आणि वयाच्या अवघ्या 40व्या वर्षी त्यांनी अखेरचा श्वास घेतला.
सिद्धार्थ यांच्या निधनाची बातमी समोर येताच त्यांच्या सहकाऱ्यांपासून चाहत्यांपर्यंत सर्वत्र हळहळ व्यक्त करण्यात येत आहे. त्यांच्या निधनाची पुष्टी अभिनेत्री सीमा जी. नायर यांनी केली. विशेष म्हणजे, उपचाराच्या संपूर्ण काळात सीमा जी. नायर या त्यांच्यासोबत खंबीरपणे उभ्या होत्या. त्यांनी केवळ मैत्रीण म्हणूनच नव्हे, तर एक आधारस्तंभ म्हणून सिद्धार्थ यांना साथ दिली.
सीमा जी. नायर यांनी सोशल मीडियावर अतिशय भावनिक शब्दांत आपली भावना व्यक्त केली. त्यांनी लिहिले की, “आता सर्व संपले… तू एका वेदनारहित जगात निघून गेला आहेस.” गेल्या दोन वर्षांत त्यांनी सिद्धार्थ यांच्या उपचारांसाठी शक्य ते सर्व प्रयत्न केले, अगदी स्वतःच्या थकव्याकडे दुर्लक्ष करूनही त्या त्यांच्या सोबत राहिल्या. मात्र, नियतीपुढे सर्व प्रयत्न अपुरे ठरले, अशी खंत त्यांनी व्यक्त केली.
सिद्धार्थ यांच्या निधनामुळे मल्याळम मनोरंजन विश्वात मोठी पोकळी निर्माण झाली आहे. अनेक कलाकारांनी त्यांना श्रद्धांजली अर्पण करत त्यांच्या साधेपणाची आणि कामाप्रती असलेल्या निष्ठेची आठवण काढली. ते फक्त एक चांगले अभिनेता नव्हते, तर सेटवर सर्वांशी जिव्हाळ्याने वागणारा, हसतमुख व्यक्तिमत्त्व म्हणून ओळखले जात होते.
अभिनेता किशोर सत्या यांनीही त्यांच्या निधनावर दुःख व्यक्त करत सांगितले की, सिद्धार्थ यांची लढण्याची जिद्द प्रेरणादायी होती. त्यांनी सीमा जी. नायर यांच्या योगदानाचेही कौतुक करत, त्यांच्या दयाळूपणाला सलाम केला.
सिद्धार्थ वेणुगोपाल यांची ही अकाली एक्झिट मनोरंजन क्षेत्रासाठी मोठा धक्का मानला जात आहे. त्यांच्या आठवणी आणि त्यांनी साकारलेली पात्रे प्रेक्षकांच्या मनात कायम राहतील.
