महाराष्ट्राच्या राजकीय वर्तुळात ठाकरे गटातील खासदारांच्या संभाव्य फुटीच्या चर्चांना वेग आला असतानाच ठाकरे गटाचे खासदार आणि प्रमुख नेते संजय राऊत यांनी गंभीर आरोप करत राजकीय वातावरण ढवळून काढले आहे. पत्रकार परिषदेत बोलताना राऊत यांनी काही खासदारांना पक्षांतरासाठी मोठ्या आर्थिक ऑफर्स दिल्या जात असल्याचा दावा केला. त्यांच्या म्हणण्यानुसार, एका महत्त्वाच्या व्यक्तीकडून त्यांना अशी माहिती मिळाली की महाराष्ट्रातील काही खासदारांना आपल्या बाजूला वळवण्यासाठी प्रयत्न सुरू आहेत. यावेळी संबंधित पक्षाचे नाव त्यांनी जाहीर केले नसले तरी, खासदारांसाठी तब्बल ५० कोटी रुपयांचा ‘हमी भाव’ ठरवण्यात आल्याची माहिती त्यांना देण्यात आल्याचा दावा त्यांनी केला. तसेच सुरुवातीच्या टप्प्यात १५-१५ कोटी रुपये देण्याची तयारी असल्याचेही सांगण्यात आल्याचे त्यांनी नमूद केले.
राऊत यांनी सध्या चर्चेत असलेल्या ‘ऑपरेशन टायगर’ या कथित राजकीय हालचालींचाही उल्लेख केला. ठाकरे गटातील काही खासदार दिल्लीमध्ये असल्याच्या, तर काही जण वेगवेगळ्या ठिकाणी संपर्कात असल्याच्या अफवा पसरवल्या जात असल्याचे त्यांनी सांगितले. मात्र पक्षाकडे यासंदर्भात कोणतीही अधिकृत माहिती नसल्याचे स्पष्ट करत त्यांनी अफवांवर विश्वास ठेवू नये, असे आवाहन केले. पुढे बोलताना त्यांनी सांगितले की, ठाकरे गटातील खासदार हे मशाल चिन्हावर आणि उद्धव ठाकरे यांच्या नेतृत्वावर विश्वास ठेवून जनतेने निवडून दिले आहेत. त्यामुळे जनादेशाशी प्रतारणा करणे योग्य ठरणार नाही, असे त्यांनी ठामपणे म्हटले. पक्षफोडीच्या राजकारणावर टीका करताना राऊत यांनी लोकप्रतिनिधींना आर्थिक प्रलोभने देऊन राजकीय समीकरणे बदलण्याचा प्रयत्न होत असेल, तर त्याचा थेट परिणाम लोकशाही व्यवस्थेवर आणि निवडणूक प्रक्रियेवरील जनतेच्या विश्वासावर होईल, असा इशाराही दिला. त्यांच्या या आरोपांमुळे राज्यातील राजकीय चर्चांना नव्याने उधाण आले असून, संबंधितांकडून अद्याप अधिकृत प्रतिक्रिया समोर आलेली नाही.
