आजच्या धावपळीच्या जीवनशैलीत आरोग्यदायी आणि पौष्टिक आहाराकडे लोकांचा कल वाढताना दिसत आहे. अशा परिस्थितीत घरच्या घरी सहज तयार होणारा नाचणीचा मिल्कशेक हा उत्तम पर्याय ठरू शकतो. नाचणी म्हणजेच रागी हे धान्य कॅल्शियम, लोह आणि फायबरने समृद्ध असल्यामुळे शरीरासाठी अत्यंत उपयुक्त मानले जाते. त्यामुळे या मिल्कशेकचा आहारात समावेश केल्यास आरोग्याला अनेक फायदे मिळू शकतात. हा पौष्टिक पेय तयार करण्यासाठी सर्वप्रथम नाचणीचे पीठ पाण्यात गुठळ्या न होता नीट शिजवून घ्यावे. हे मिश्रण थंड झाल्यानंतर मिक्सरमध्ये टाकावे. त्यात दूध, पिकलेली केळी आणि आधी भिजवून ठेवलेले खजूर घालून सर्व मिश्रण बारीक करून घ्यावे. या प्रक्रियेमुळे मिल्कशेकला नैसर्गिक गोडवा आणि क्रीमी टेक्स्चर प्राप्त होते.
त्यानंतर तयार झालेले मिश्रण ग्लासात ओतून त्यात बदाम पावडर मिसळावी. बदामामुळे या पेयाची पौष्टिकता आणखी वाढते. शेवटी वेलची पूड आणि आवडीप्रमाणे ड्रायफ्रूट्स घालून सजावट करावी. त्यामुळे मिल्कशेकचा स्वाद अधिकच खुलतो.
हा नाचणी मिल्कशेक लहान मुलांसाठी, वृद्धांसाठी तसेच फिटनेसकडे लक्ष देणाऱ्या व्यक्तींसाठी विशेष लाभदायक आहे. सकाळच्या नाश्त्यासोबत किंवा संध्याकाळच्या वेळेस ऊर्जा देणारे पेय म्हणूनही तो उत्तम पर्याय ठरतो. घरच्या घरी सहज तयार होणारा हा हेल्दी मिल्कशेक चव आणि पोषण यांचा उत्तम संगम आहे.
