हैदराबादकडून सलग तिसऱ्या पराभवाचा धक्का
आयपीएल २०२६ च्या सुरुवातीला सलग सहा सामने जिंकून खळबळ माजवणाऱ्या श्रेयस अय्यरच्या पंजाब किंग्सची गाडी आता रुळावरून घसरली असून, सनरायझर्स हैदराबादविरुद्ध त्यांना ३३ धावांनी सलग तिसरा पराभव स्वीकारावा लागला आहे. या सामन्यात हैदराबादने २३६ धावांचा डोंगर उभा केला, ज्यामध्ये पंजाबच्या ढिसाळ क्षेत्ररक्षणाचा मोठा वाटा होता. सलामीवीर इशान किशनला पंजाबच्या खेळाडूंनी तब्बल तीनवेळा जीवनदान दिले; तो ९ धावांवर असताना कूपर कॉनॉलीने झेल सोडला, १८ धावांवर असताना लॉकी फर्ग्युसनने संधी गमावली आणि २० धावांवर असताना प्रभसिमरन सिंगने त्याचे स्टंपिंग चुकवले. या संधींचा फायदा घेत इशानने ५५ धावांची खेळी केली आणि सामना संपल्यानंतर इन्स्टाग्रामवर “Catch me if you can” अशी पोस्ट टाकत पंजाबच्या फिल्डिंगची खिल्ली उडवली. केवळ इशानच नाही, तर हेनरिक क्लासेनलाही १३ धावांवर असताना शशांक सिंगने जीवनदान दिले, ज्याचे रूपांतर क्लासेनने ६९ धावांच्या तडाखेबंद खेळीत केले. शशांक सिंगसाठी हा हंगाम क्षेत्ररक्षणाच्या बाबतीत अत्यंत खराब ठरत असून त्याने आतापर्यंत एकूण पाच झेल सोडले आहेत. वारंवार मिळणाऱ्या या जीवनदानांमुळे हैदराबादला मोठी धावसंख्या उभारता आली आणि पंजाबला सलग तिसऱ्या पराभवाचा सामना करावा लागला.
