छत्रपती संभाजीनगरमध्ये अन्न सुरक्षा नियमांचे उल्लंघन करणाऱ्या उत्पादनांविरोधात अन्न व औषध प्रशासनाने (FDA) मोठी कारवाई करत हजारो बाटल्यांचा साठा जप्त केला आहे. अन्न सुरक्षा आणि मानके प्राधिकरणाच्या (FSSAI) निर्देशांनुसार तसेच राज्याच्या अन्न सुरक्षा यंत्रणेच्या मार्गदर्शनाखाली ही मोहीम राबविण्यात आली. वाळूज एमआयडीसी परिसरातील एका नामांकित उत्पादन कंपनीवर टाकलेल्या छाप्यात “ENERZAL” या रेडी-टू-सर्व्ह (RTS) फ्रूट बेव्हरेज, एनर्जी आणि इलेक्ट्रोलाइट ड्रिंकच्या तब्बल 84 हजारांहून अधिक बाटल्या जप्त करण्यात आल्या. जप्त करण्यात आलेल्या या साठ्याची किंमत सुमारे 36 लाख रुपयांपेक्षा जास्त असल्याची माहिती अधिकाऱ्यांनी दिली आहे.
मिळालेल्या माहितीनुसार, संबंधित उत्पादनाच्या लेबलिंग आणि ब्रँडिंगमध्ये नियमांचे उल्लंघन झाल्याचा संशय व्यक्त करण्यात आला होता. प्राथमिक तपासणीत उत्पादन “मिसब्रँडेड” असल्याचे आढळून आल्याने अन्न सुरक्षा आणि मानके कायद्यानुसार तातडीने कारवाई करण्यात आली. ग्राहकांची दिशाभूल होण्याची शक्यता लक्षात घेऊन प्रशासनाने संपूर्ण साठा ताब्यात घेत पुढील तपास सुरू केला आहे.
या कारवाईदरम्यान कंपनीच्या अधिकृत प्रतिनिधींशी संबंधित कागदपत्रांचीही तपासणी करण्यात आली. अन्न सुरक्षा अधिकाऱ्यांच्या विशेष पथकाने नियोजनबद्ध पद्धतीने ही मोहीम राबवत उत्पादनाची सविस्तर पाहणी केली. वरिष्ठ अधिकाऱ्यांच्या मार्गदर्शनाखाली झालेल्या या कारवाईमुळे उद्योग क्षेत्रातही खळबळ उडाली आहे.
अन्न व औषध प्रशासनाने ग्राहकांच्या आरोग्याशी कोणत्याही प्रकारची तडजोड सहन केली जाणार नसल्याचे स्पष्ट केले आहे. अन्नपदार्थांच्या उत्पादन, पॅकेजिंग आणि विक्री प्रक्रियेत नियमांचे काटेकोर पालन करणे आवश्यक असून, नियमांचे उल्लंघन करणाऱ्या उत्पादकांवर कठोर कारवाई केली जाईल, असा इशाराही प्रशासनाने दिला आहे. या कारवाईमुळे ग्राहक संरक्षण आणि अन्न सुरक्षा सुनिश्चित करण्याच्या दिशेने प्रशासनाच्या प्रयत्नांना आणखी बळ मिळाल्याचे मानले जात आहे.
