सेटवर घडलेला प्रकार; फराह खानने दिला प्रकृतीबाबत दिलासादायक अपडेट
बॉलिवूडमधील प्रसिद्ध दिग्दर्शक आणि ‘बिग बॉस’चा माजी स्पर्धक साजिद खान पुन्हा एकदा चर्चेत आला आहे. यावेळी कारण मात्र धक्कादायक आहे. चित्रीकरण सुरू असतानाच साजिद खानचा अपघात झाल्याची माहिती समोर आली आहे. शनिवारी शूटिंगदरम्यान हा अपघात घडला असून यात साजिदच्या पायाला फ्रॅक्चर झाले आहे.
अपघातानंतर दुसऱ्याच दिवशी साजिद खानला तातडीने रुग्णालयात दाखल करण्यात आले. रविवारी त्याच्यावर शस्त्रक्रिया करण्यात आली असून ती यशस्वी झाल्याची माहिती त्याची बहीण आणि प्रसिद्ध कोरिओग्राफर-दिग्दर्शिका फराह खान हिने दिली आहे. फराह खानने सांगितले की, “साजिदवर शस्त्रक्रिया यशस्वीरित्या पार पडली आहे. सध्या त्याची प्रकृती स्थिर असून तो हळूहळू बरा होत आहे. काळजी करण्यासारखे काही नाही.”
मिळालेल्या माहितीनुसार, साजिद खान हा अपघाताच्या वेळी एकता कपूरच्या प्रॉडक्शन अंतर्गत सुरू असलेल्या प्रोजेक्टचे शूटिंग करत होता. दीर्घ विश्रांतीनंतर तो पुन्हा दिग्दर्शनात सक्रिय होण्याच्या तयारीत होता.
साजिद खानचा शेवटचा चित्रपट ‘हमशकल्स’ २०१४ मध्ये प्रदर्शित झाला होता. २००५ मध्ये ‘डरना मना है’ या हॉरर चित्रपटातून त्याने दिग्दर्शनाची सुरुवात केली होती. २००७ मधील ‘हे बेबी’ या कॉमेडी चित्रपटामुळे त्याला विशेष लोकप्रियता मिळाली. त्यानंतर ‘हाऊसफुल’ आणि ‘हाऊसफुल २’ यांसारखे चित्रपट बॉक्स ऑफिसवर यशस्वी ठरले.
दरम्यान, साजिद खान २०२२ मध्ये ‘बिग बॉस’ या रिअॅलिटी शोमधून पुन्हा चर्चेत आला होता. काही वर्षांपूर्वी #MeToo चळवळीमुळेही तो वादाच्या भोवऱ्यात सापडला होता, ज्यामध्ये त्याच्यावर काही महिलांनी आरोप केले होते.
दरम्यान, त्याची बहीण फराह खान सध्या तिच्या यूट्यूब चॅनलमुळे चर्चेत आहे. या चॅनलवर ती विविध सेलिब्रिटींच्या घरी जाऊन स्वयंपाक करते. तिच्यासोबत असणारा कूक दिलीपही या व्हिडिओंमुळे सोशल मीडियावर लोकप्रिय झाला आहे. फराहचे हे व्हिडिओ मोठ्या प्रमाणावर व्हायरल होत असून प्रेक्षकांकडून चांगला प्रतिसाद मिळत आहे.
