“सोनम वांगचुक यांच्या उपोषणाकडे दुर्लक्ष करणारे सरकार निर्दयी”; प्रफुल्ल पटेल-तटकऱ्यांचा ‘कपटी’ असा उल्लेख करत सुनेत्रा पवारांना दिला महत्त्वाचा इशारा!
प्रसिद्ध सामाजिक कार्यकर्त्या अंजली दमानिया यांनी सध्याच्या चालू राजकीय घडामोडींवर आणि संवेदनशील मुद्द्यांवर अत्यंत स्फोटक भाष्य केले आहे. शिवसेना ठाकरे गटाचे नेते विनायक राऊत यांच्या घरगुती वादाच्या प्रकरणापासून ते दिल्लीतील सोनम वांगचुक यांच्या उपोषणापर्यंतच्या अनेक मुद्द्यांवर दमानिया यांनी आपली रोखठोक मते मांडली आहेत.
विनायक राऊत यांची सून गिरीजा राऊत हिने राऊत कुटुंबावर केलेल्या गंभीर आरोपांनंतर दमानिया यांनी आक्रमक पवित्रा घेतला आहे. “विनायक राऊत यांना कोर्टाकडून कोणताही दिलासा मिळालेला नाही. या प्रकरणात त्यांना तत्काळ अटक करणे गरजेचे होते. जर त्यांच्या जागी एखादा सामान्य माणूस असता तर पोलिसांनी त्याला कधीच जेलमध्ये टाकले असते, पण इथे राजकीय नेत्यांना वेगळा न्याय मिळताना दिसत आहे. अशा नेत्यांना धडा शिकवलाच पाहिजे,” अशी थेट मागणी त्यांनी केली आहे. तसेच फिरोज बाबा आणि काझी बाबा यांच्यावरही कारवाईची गरज त्यांनी व्यक्त केली.
दिल्लीतील आंदोलनावरून परतल्यानंतर दमानिया यांनी आंदोलनकर्ते सोनम वांगचुक यांच्या ढासळत्या प्रकृतीबाबत तीव्र चिंता व्यक्त केली. त्या म्हणाल्या, “वांगचुक यांचे डब्ल्युबीसी (WBC), शुगर आणि बीपी अत्यंत खाली आले आहे. प्रकृती इतकी खालावली असतानाही ते आपल्या पत्नीचेही ऐकत नाहीत. आपले ध्येय साध्य झाल्याशिवाय उपोषण सोडणार नाही, यावर ते ठाम आहेत. मात्र, या असंवेदनशील आणि निर्दयी सरकारला याचे काहीच देणेघेणे नाही.”
अंजली दमानिया यांनी राष्ट्रवादीचे नेते प्रफुल्ल पटेल आणि सुनील तटकरे यांच्यावर अत्यंत गंभीर आरोप करत त्यांना ‘कपटी नेते’ असे म्हटले आहे. “हे दोघे किती कपटी आहेत, हे सुनेत्रा पवार जेवढ्या लवकर समजून घेतील तेवढे त्यांच्यासाठी चांगले आहे. सुनेत्रा यांच्यासमोर धोक्याचे अनेक लाल कंदील (Red Flags) आहेत, त्यांनी वेळीच योग्य ती पावले उचलावीत,” असा इशारा त्यांनी दिला. यासोबतच, भाजप नेते सुधीर मुनगंटीवार यांना पक्षात सातत्याने डावलले जात असल्याबद्दल त्यांनी खेद व्यक्त केला.
