शेवटच्या ७ मिनिटांत ‘गॉड ऑफ फुटबॉल’ने फिरवली मॅच; गोल न करताही दोन ‘जादुई पास’च्या जोरावर अर्जेंटिनाने ठोकला फायनलचा रस्ता!
फिफा वर्ल्डकप २०२६ च्या दुसऱ्या सेमीफायनल सामन्यात फुटबॉल इतिहासातील एक सर्वात थरारक आणि अविस्मरणीय विजय पाहायला मिळाला. दिग्गज खेळाडू लियोनेल मेसीने पुन्हा एकदा सिद्ध केले की त्याला फुटबॉलचा जादूगार का म्हणतात! मेसीच्या अफाट अनुभवाच्या आणि जादुई खेळाच्या जोरावर गतविजेत्या अर्जेंटिनाने इंग्लंडचे वर्ल्डकप जिंकण्याचे स्वप्न धुळीस मिळवले. अत्यंत अटीतटीच्या झालेल्या या सामन्यात अर्जेंटिनाने इंग्लंडवर २-१ अशा फरकाने मात करत सलग दुसऱ्यांदा फिफा वर्ल्डकपच्या अंतिम फेरीत धडक मारली आहे. आता रविवारी न्यू जर्सी येथे वर्ल्डकपच्या किताबासाठी अर्जेंटिना आणि स्पेन समोरासमोर ठाकणार आहेत.
मर्सिडीज-बेंज स्टेडियमवर जेव्हा हा सामना सुरू झाला, तेव्हा दोन्ही देशांच्या चाहत्यांच्या घोषणांनी स्टेडियम दुमदुमून गेले होते. सामन्याच्या सुरुवातीपासूनच मैदानावर प्रचंड तणाव पाहायला मिळाला. पहिल्या हाफमध्ये खेळापेक्षा खेळाडूंमधील वाद आणि फाऊलच जास्त चर्चेत राहिले. तिसऱ्याच मिनिटाला एंजो फर्नांडेजच्या एका फाऊलनंतर दोन्ही संघांचे खेळाडू एकमेकांना भिडले. इंग्लंडच्या डिफेंडर्सनी मेसीला पूर्णपणे ब्लॉक करून ठेवले होते, ज्यामुळे त्याला मोकळेपणाने खेळता येत नव्हते. या वादावादीत अर्जेंटिनाच्या मार्टिनेजला आणि इंग्लंडच्या इलियट अँडरसनला ‘यलो कार्ड’चा सामना करावा लागला. पहिला हाफ ०-० अशा बरोबरीत सुटला.
दुसऱ्या हाफमध्ये खेळाचा नूर पूर्णपणे बदलला. सामन्याच्या ५५ व्या मिनिटाला इंग्लंडच्या मोर्गन रोजर्सने दिलेल्या एका अचूक पासवर अँथनी गॉर्डनने अप्रतिम फिनिशिंग करत चेंडू गोलपोस्टच्या जाळ्यात धाडला. या गोलसह इंग्लंडने १-० अशी भक्कम आघाडी घेतली. या गोलनंतर अर्जेंटिनाचा संघ प्रचंड दबावाखाली आला. सामना संपायला अवघी काही मिनिटे शिल्लक असल्याने इंग्लंडचा विजय अगदी निश्चित मानला जात होता आणि अर्जेंटिनाच्या चाहत्यांची धाकधूक वाढली होती.
जेव्हा संघाला सर्वात जास्त गरज होती, तेव्हा ‘गॉड ऑफ फुटबॉल’ म्हणून ओळखल्या जाणाऱ्या लियोनेल मेसीने सामन्याची सूत्रे आपल्या हाती घेतली. सामन्यात स्वतः एकही गोल न करणाऱ्या मेसीने जे केले, ते केवळ तोच करू शकत होता. ८५ व्या मिनिटाला मेसीने इंग्लंडच्या बचावपटूंना चकवून एंजो फर्नांडेजकडे एक अप्रतिम पास दिला. फर्नांडेजने बॉक्सच्या बाहेरून थेट ‘बुलेट शॉट’ मारत स्कोअर १-१ अशा बरोबरीत आणला.
सामना एक्स्ट्रा टाईममध्ये जाणार असे वाटत असतानाच, भरपाई वेळेत (Injury Time) मेसीने पुन्हा एकदा सर्वांच्या नजरा चुकवून एक अचूक आणि जादुई पास दिला. या पासवर लाउतारो मार्टिनेजने कोणतीही चूक न करता चेंडू गोलमध्ये वळवला आणि स्टेडियममध्ये एकच जल्लोष झाला. अवघ्या ७ मिनिटांत अर्जेंटिनाने १-० वरून २-१ अशी आघाडी घेत सामना खिशात घातला आणि फायनलचे तिकीट पक्के केले.
