पुराव्यांअभावी खासदारपुत्र सौरव सोनवणे यांना पोलिसांकडून दिलासा; चौकशीनंतर बाळासाहेब पाथरकर यांच्या अडचणीत वाढ
बीड जिल्ह्यातील केज तालुक्यातील टाकळी येथील हॉटेल व्यावसायिक विलास घुले हत्या प्रकरणात दररोज धक्कादायक दावे-प्रतिदावे समोर येत आहेत. दोन गटांतील भांडण सोडवण्यासाठी गेलेल्या विलास घुले यांची निर्घृण हत्या करण्यात आली होती. या हाय-प्रोफाइल खून प्रकरणात थेट बीडचे नवनिर्वाचित खासदार बजरंग सोनवणे यांचे सुपुत्र सौरव सोनवणे यांचे नाव आल्याने महाराष्ट्राच्या राजकीय वर्तुळात मोठी खळबळ उडाली होती. पीडित कुटुंबाने केलेल्या आंदोलनाची दखल घेत राज्य सरकारने या प्रकरणी विशेष तपास पथक (SIT) स्थापन केले होते. मात्र, आता या प्रकरणाला अत्यंत वेगळे आणि नाट्यमय वळण मिळाले आहे.
पोलिस सूत्रांकडून मिळालेल्या अत्यंत विश्वासार्ह माहितीनुसार, विलास घुले यांच्या भावाने म्हणजेच रमेश घुले यांनी नोंदवलेल्या पुरवणी जबाबानंतर एसआयटीने खासदारपुत्र सौरव सोनवणे यांची तब्बल ४ तास कसून चौकशी केली होती. मात्र, तपासादरम्यान सौरव सोनवणे यांच्या विरोधात हत्येशी संबंधित कोणताही ठोस पुरावा पोलिसांच्या हाती लागलेला नाही. त्यामुळे पोलिसांनी त्यांचा केवळ अधिकृत जबाब नोंदवून घेऊन त्यांना सोडून दिले आहे. दरम्यान, चौकशीच्या वेळी सौरव सोनवणे यांचा पोलिसांसोबत हातात हात घालून गप्पा मारतानाचा एक फोटो सोशल मीडियावर तुफान व्हायरल झाला होता, ज्यावरून ‘प्रशासन आरोपींना पाठीशी घालत आहे का?’ असा सवाल उपस्थित करत ग्रामस्थांनी पाण्याच्या टाकीवर चढून पुन्हा आंदोलन केले होते.
या प्रकरणातील राजकीय आणि सामाजिक संघर्ष आता आणखी तीव्र झाला आहे. दोन दिवसांपूर्वी खासदार बजरंग सोनवणे यांचे खंदे समर्थक बाळासाहेब पाथरकर यांनी रमेश घुले यांच्या गुन्हेगारी पार्श्वभूमीवर जाहीर वाच्चता केली होती. रमेश घुले यांच्यावर बीड जिल्ह्यात अनेक गुन्हे दाखल असून, त्यांच्यावर ‘एमपीडीए’ (MPDA – झोपडपट्टी दादा व धोकादायक व्यक्ती प्रतिबंधक कायदा) अंतर्गत कठोर कारवाई करावी, अशी जाहीर मागणी पाथरकर यांनी केली होती.
बाळासाहेब पाथरकर यांच्या या विधानामुळे आपली समाजात नाहक बदनामी झाल्याचा दावा रमेश घुले यांनी केला. यावरून त्यांनी केज पोलीस ठाण्यात अधिकृत तक्रार दिली. रमेश घुले यांच्या या तक्रारीची दखल घेत पोलिसांनी खासदार समर्थक बाळासाहेब पाथरकर यांच्या विरोधात गुन्हा दाखल केला आहे. या संपूर्ण वादामुळे केज परिसरात सध्या कमालीचे तणावपूर्ण वातावरण निर्माण झाले आहे.
