स्मृती मंधानाकडे उपकर्णधारपद कायम; खराब कामगिरीनंतरही बीसीसीआयने ‘कॅप्टन कूल’ला दिली आणखी एक संधी
आयसीसी महिला टी-२० विश्वचषक २०२६ मधील निराशाजनक कामगिरीनंतर भारतीय महिला क्रिकेट संघाच्या कर्णधारपदाबाबत मोठी चर्चा सुरू होती. मात्र, बीसीसीआयने (BCCI) अनुभवी खेळाडू हरमनप्रीत कौरवर पुन्हा एकदा आपला विश्वास दाखवला आहे. जपानमधील आयची-नागोया येथे १९ सप्टेंबर ते ४ ऑक्टोबर दरम्यान होणाऱ्या आशियाई क्रीडा स्पर्धेसाठी १५ सदस्यीय भारतीय महिला संघाची अधिकृत घोषणा करण्यात आली असून, या आगामी मोहिमेचे नेतृत्व हरमनप्रीत कौरकडेच सोपवण्यात आले आहे. तर आक्रमक फलंदाज स्मृती मंधाना ही संघाची उपकर्णधार म्हणून आपली जबाबदारी चोख सांभाळेल.
नुकत्याच पार पडलेल्या विश्वचषकात भारतीय संघाचा प्रवास गट फेरीतच संपला होता. ऑस्ट्रेलियाकडून झालेल्या पराभवानंतर संघाचे आव्हान संपुष्टात आले होते. या खराब कामगिरीमुळे ३७ वर्षीय हरमनप्रीतच्या नेतृत्वावर प्रश्नचिन्ह उपस्थित केले जात होते, कारण तिच्याच नेतृत्वाखाली भारताने गेल्या वर्षी महिला एकदिवसीय विश्वचषक जिंकला होता. आता या आशियाई स्पर्धेत भारतीय संघ ‘गतविजेता’ म्हणून मैदानात उतरेल; कारण २०२३ मध्ये चीनमधील हांगझू येथे झालेल्या आशियाई खेळांमध्ये भारताने सुवर्णपदक पटकावले होते. या स्पर्धेत क्रिकेटचे सामने टी-२० फॉरमॅटमध्ये खेळवले जाणार आहेत.
नवीन संघात विश्वचषक संघातून यष्टीरक्षक-फलंदाज यास्तिका भाटियाला डच्चू देण्यात आला असून, तिच्या जागी जी. कमलिनीला संधी मिळाली आहे. तसेच, दुखापतीमुळे त्रस्त असलेली अष्टपैलू खेळाडू श्रेयंका पाटील हिचे संघात पुनरागमन झाले असले, तरी तिचा अंतिम सहभाग तिच्या तंदुरुस्तीवर अवलंबून असेल. विशेष म्हणजे, विश्वचषकातील चढ-उतारानंतरही भारतीय संघाने सर्वोच्च मानांकित आशियाई संघ म्हणून २०२८ च्या लॉस एंजेलिस ऑलिम्पिकसाठी थेट पात्रता मिळवली आहे.
फलंदाजीची मुख्य धुरा हरमनप्रीतसह स्मृती मंधाना, शेफाली वर्मा, जेमिमा रॉड्रिग्स आणि रिचा घोष यांच्यावर असेल. तर गोलंदाजी विभागाची जबाबदारी दीप्ती शर्मा, रेणुका सिंग, श्री चरणी, अरुंधती रेड्डी आणि नंदिनी शर्मा सांभाळतील.
आशियाई क्रीडा स्पर्धा २०२६ साठी संपूर्ण भारतीय संघ:
हरमनप्रीत कौर (कर्णधार), स्मृती मंधाना (उपकर्णधार), शेफाली वर्मा, जेमिमा रॉड्रिग्स, दीप्ती शर्मा, रिचा घोष, जी. कमलिनी, भारती फुलमाली, श्री चरणी, रेणुका ठाकूर, क्रांती गौड, अरुंधती रेड्डी, श्रेयंका पाटील, राधा यादव, नंदिनी शर्मा.
