“संघात ऑलराउंडर्सचा सुळसुळाट, पण…” – मालिका गमावल्यानंतर संजय मांजरेकरांनी गंभीरच्या रणनीतीवरच उपस्थित केले गंभीर प्रश्न!
विश्वविजेत्या भारतीय क्रिकेट संघाला आयर्लंड दौऱ्यात पत्कराव्या लागलेल्या धक्कादायक पराभवामुळे क्रिकेट जगतात खळबळ माजली आहे. भारतीय संघ सहज विजय मिळवेल अशा अविर्भावात आयर्लंडमध्ये दाखल झाला होता, मात्र यजमान संघाने मायदेशातील परिस्थितीचा चोख फायदा उठवत टीम इंडियाला पुरते लोळवले. या लाजिरवाण्या कामगिरीमुळे भारतीय चाहत्यांचे डोळे खाडकन उघडले असून, या ऐतिहासिक पराभवाचे खापर आता मुख्य प्रशिक्षक गौतम गंभीर यांच्या रणनितीवर फोडले जात आहे.
भारताचे माजी क्रिकेटपटू आणि प्रसिद्ध समालोचक संजय मांजरेकर यांनी थेट गंभीरच्या कार्यकाळातील संघ संतुलनावरच (Team Balance) बोट ठेवले आहे. मालिकेतील पहिल्या सामन्यात ३४ धावांनी आणि दुसऱ्या रोमांचक सामन्यात अवघ्या १ धावेने पराभूत झाल्यानंतर मांजरेकर यांनी सोशल मीडियावर पोस्ट करत गंभीरच्या धोरणावर टीका केली. त्यांच्या मते, गंभीरच्या मार्गदर्शनाखाली संघात गरजेपेक्षा जास्त ऑलराउंडर्स भरले गेले आहेत. “पूर्वी ऑलराउंडर्सची संख्या खूप कमी होती, पण आता ती प्रमाणाबाहेर गेली आहे. भारताला सध्या संघात केवळ ‘शुद्ध’ मधल्या फळीतील फलंदाजांची (Pure Middle Order Batter) गरज आहे,” असा सल्लावजा टोला मांजरेकरांनी लगावला.
या मालिकेत भारतीय फलंदाजीची दयनीय अवस्था पाहायला मिळाली. पहिल्या सामन्यात १८३ धावांच्या आव्हानाचा पाठलाग करताना अभिषेक शर्माने २० चेंडूंत ४९ धावांची स्फोटक सुरुवात करून दिली खरी, मात्र मधली फळी पत्त्याच्या बंगल्यासारखी कोसळली. श्रेयस अय्यर, इशान किशन, टिळक वर्मा, शिवम दुबे आणि अक्षर पटेल यांसारखे मोठे चेहरे खेळपट्टीवर तग धरू शकले नाहीत आणि संपूर्ण संघ १४८ धावांवर गारद झाला.
दुसऱ्या टी-२० सामन्यातही हीच कहाणी पुनरावृत्ती झाली. टिळक वर्मा (५५ धावा) आणि शिवम दुबे यांनी भागीदारी रचून विजयाची आशा नक्कीच पल्लवित केली होती, परंतु ऐन मोक्याच्या क्षणी हे दोन्ही फलंदाज बाद झाले आणि भारताच्या हातातून सामना व मालिका दोन्ही निसटले. नवोदित आणि ऑलराउंडर्सच्या अवाजवी प्रयोगांमुळे भारताला या नामुष्कीला सामोरे जावे लागल्याचे बोलले जात आहे.
