संजय दत्तसोबतच्या ‘त्या’ १० कोटींच्या गाजलेल्या सीनची पुन्हा चर्चा; १० जुलैला चित्रपट चित्रपटगृहात धुमाकूळ घालणार
बॉलिवूडमधील सर्वात यशस्वी विनोदी फ्रँचायझींपैकी एक असलेला ‘धमाल’ चित्रपट आता आपल्या चौथ्या भागासह प्रेक्षकांचे मनोरंजन करण्यासाठी सज्ज झाला आहे. नुकताच ‘धमाल ४’चा अधिकृत ट्रेलर सोशल मीडियावर रिलीज करण्यात आला असून, प्रेक्षकांनी त्याला डोक्यावर घेतले आहे. ट्रेलरमधील जबरदस्त पंचलाईन्स, कलाकारांची कमाल कॉमेडी टाइमिंग आणि जुन्या भागांमधील काही मजेशीर संदर्भांमुळे चाहत्यांची उत्सुकता शिगेला पोहोचली आहे.
या नव्या ट्रेलरमुळे २००७ मधील मूळ ‘धमाल’ चित्रपटातील एका आयकॉनिक सीनची सोशल मीडियावर जोरदार चर्चा रंगली आहे. संजय दत्तच्या पात्राकडे तब्बल १० कोटी रुपयांची मागणी करणारा आणि हिमेश रेशमियाचा चाहता असलेला तो लहान मुलगा आजही प्रेक्षकांच्या चांगलाच लक्षात आहे. मूळ चित्रपटात ही भूमिका साहिल चौहान याने साकारली होती. आता तब्बल १९ वर्षांनंतर ‘धमाल ४’ मध्ये तशाच प्रकारच्या एका दृश्याची झलक पाहायला मिळाल्याने चाहत्यांच्या जुन्या आठवणी ताज्या झाल्या आहेत.
विशेष म्हणजे, यावेळी या महत्त्वाच्या बालकलाकाराच्या भूमिकेत रियांश दाभी हा नवा चेहरा प्रेक्षकांच्या भेटीला येत आहे. ट्रेलरमध्ये रियांशच्या निरागस पण तितक्याच विनोदी अभिनयाचे कौतुक होत असून, चित्रपटात त्याची भूमिका महत्त्वाची असेल असे दिसते. दिग्दर्शक इंद्र कुमार यांच्या दिग्दर्शनाखाली बनलेला हा बहुप्रतिक्षित चित्रपट येत्या १० जुलै २०२६ रोजी चित्रपटगृहात प्रदर्शित होणार आहे. जुनी स्टारकास्ट आणि नव्या पात्रांची जुगलबंदी असलेला हा चित्रपट बॉक्स ऑफिसवर पुन्हा एकदा कमाईचे नवे रेकॉर्ड प्रस्थापित करेल, अशी शक्यता वर्तवली जात आहे.
