पुणे जिल्ह्यातील भोर तालुक्यातील नसरापूर गावात घडलेली एका निरागस चिमुकलीवरील अत्याचार आणि हत्येची घटना संपूर्ण राज्याला हादरवून सोडणारी ठरली आहे. या प्रकरणात आरोपीने अत्यंत क्रूर पद्धतीने गुन्हा केला असून त्यानंतर मुलीचा मृतदेह लपवण्याचाही प्रयत्न केला. या घटनेनंतर स्थानिक नागरिकांमध्ये तीव्र संताप व्यक्त होत आहे.
मिळालेल्या माहितीनुसार, आरोपीने चिमुकलीवर लैंगिक अत्याचार केल्यानंतर तिची निर्दयीपणे हत्या केली. गुन्हा लपवण्यासाठी मृतदेह दगडाने ठेचून आणि शेणाच्या ढिगाऱ्याखाली लपवण्यात आला होता. पोलिसांनी तपास सुरू केल्यानंतर हा प्रकार उघडकीस आला.
दरम्यान, पीडितेचा मृतदेह शवविच्छेदनासाठी पाठवण्यात आला होता. ही प्रक्रिया विशेष लक्ष ठेवून कॅमेऱ्यासमोर करण्यात आली. शवविच्छेदन अहवालातून समोर आलेल्या तपशीलांनी आणखी धक्का दिला आहे. डॉक्टरांच्या निष्कर्षानुसार, मुलीचा मृत्यू ॲस्फिक्सियामुळे, म्हणजेच श्वास गुदमरल्यामुळे झाला. आरोपीने तिच्या तोंडात मोजा कोंबल्यामुळे श्वसनमार्ग अडथळला गेला आणि मेंदूसह शरीराच्या इतर अवयवांना पुरेसा ऑक्सिजन मिळू शकला नाही.
या अमानुष कृत्यामुळे संपूर्ण परिसरात भीती आणि संतापाचे वातावरण निर्माण झाले आहे. नागरिकांनी आरोपीला कठोरात कठोर शिक्षा देण्याची मागणी केली आहे. पोलिसांकडून पुढील तपास वेगाने सुरू असून न्याय मिळवण्यासाठी प्रयत्न सुरू असल्याचे सांगितले जात आहे.
