सह्याद्रीच्या दाट जंगलातून वन्यजीव प्रेमींसाठी एक आनंददायी आणि महत्त्वाची बातमी समोर आली आहे. सह्याद्री व्याघ्र अभयारण्य परिसरात बसवलेल्या कॅमेरा ट्रॅपमध्ये दुर्मिळ काळा बिबट्या, म्हणजेच मेलॅनिस्टिक बिबट्या, कैद झाला आहे. या घटनेमुळे सह्याद्रीच्या जंगलातील समृद्ध जैवविविधतेची पुन्हा एकदा प्रचिती आली आहे.
महाराष्ट्रातील पश्चिम घाट भागात काळ्या बिबट्यांचे अस्तित्व अत्यंत दुर्मिळ मानले जाते. त्यामुळे ही नोंद वन विभाग आणि वन्यजीव संशोधकांसाठी विशेष महत्त्वाची ठरत आहे. अशा प्रकारच्या निरीक्षणांमुळे जंगलातील परिसंस्थेच्या आरोग्याबाबत सकारात्मक संकेत मिळतात. तिलारी, राधानगरी, रत्नागिरी आणि सह्याद्रीच्या इतर घनदाट जंगल पट्ट्यांमध्ये या प्रकारच्या बिबट्यांची अधूनमधून उपस्थिती आढळते. या भागात मोठ्या प्रमाणावर पर्जन्य, दाट झाडी आणि अंधुक वातावरण असल्यामुळे काळ्या बिबट्यांना नैसर्गिक छद्मावरण मिळतं. त्यामुळे ते शिकार करताना किंवा हालचाल करताना सहजपणे लपून राहू शकतात.
तज्ज्ञांच्या मते, काळा बिबट्या ही वेगळी प्रजाती नसून साध्या बिबट्याचाच एक प्रकार आहे. जनुकीय बदलांमुळे त्यांच्या अंगावरील रंग अधिक गडद होतो, ज्यामुळे त्यांचा रंग पूर्णपणे काळसर दिसतो. ही नैसर्गिक प्रक्रिया असून ती काही विशिष्ट प्रदेशात अधिक आढळते. जगातील सर्वाधिक जैवविविधतेने समृद्ध पट्ट्यांपैकी पश्चिम घाट एक मानला जातो. येथे अनेक दुर्मिळ वनस्पती, प्राणी आणि पक्ष्यांचे अधिवास आहेत. अशा परिस्थितीत काळ्या बिबट्याचं दर्शन म्हणजे या जंगल परिसंस्थेची समृद्धी आणि संतुलन टिकून असल्याचा दिलासा देणारा संकेत मानला जात आहे.
