राज्यात १ मेपासून मराठी भाषा वाचता आणि लिहिता न येणाऱ्या रिक्षा व टॅक्सी चालकांवर कारवाई करण्याचा निर्णय जाहीर झाल्यानंतर वातावरण तापले आहे. परिवहन मंत्री प्रताप सरनाईक यांनी स्पष्ट इशारा देत अशा चालकांचे परवाने रद्द केले जाऊ शकतात, असे सांगितले आहे. या निर्णयाला मोठ्या प्रमाणावर विरोध होत असून, सुमारे १५ लाख रिक्षाचालकांनी ४ मेपासून संपावर जाण्याची घोषणा केली आहे.
या पार्श्वभूमीवर मराठी मनोरंजन क्षेत्रातूनही प्रतिक्रिया उमटत आहेत. प्रसिद्ध दिग्दर्शक हेमंत ढोमे यांनी या मुद्द्यावर तीव्र नाराजी व्यक्त केली आहे. त्यांनी सोशल मीडियावर पोस्ट करत स्पष्ट शब्दांत सांगितले की, “इतका मोठा आकडा असलेल्या लोकांना जर मराठी नको असेल, तर त्यांनी आपल्या राज्यात परत जावे. महाराष्ट्रात राहून मराठी शिकणे आणि बोलणे आवश्यक आहे.”
हेमंत ढोमे यांची मराठी भाषेबाबतची भूमिका आधीपासूनच ठाम राहिली आहे. त्यांनी ‘झिम्मा’ आणि ‘झिम्मा २’ यांसारख्या लोकप्रिय चित्रपटांचे दिग्दर्शन केले असून, सामाजिक विषयांना हलक्याफुलक्या पद्धतीने मांडण्याची त्यांची शैली प्रेक्षकांना आवडते. तसेच ‘क्रांतीज्योती विद्यालय : मराठी माध्यम’ या चित्रपटातून त्यांनी मराठी शिक्षण आणि भाषेचे महत्त्व प्रभावीपणे मांडले आहे.
दरम्यान, सरकारच्या निर्णयामुळे भाषा, रोजगार आणि स्थानिक ओळख या मुद्द्यांवर मोठी चर्चा सुरू झाली आहे. संप झाल्यास शहरातील वाहतूक व्यवस्थेवर त्याचा परिणाम होण्याची शक्यता व्यक्त केली जात आहे. एकीकडे सरकार स्थानिक भाषेला प्राधान्य देत आहे, तर दुसरीकडे काही चालक या निर्णयाला अन्यायकारक मानत आहेत. त्यामुळे हा वाद पुढील काही दिवसांत अधिक चिघळण्याची चिन्हे आहेत.
