गिरीश ओक यांनी ऑनलाइन टीकाकारांना सुनावलं.
मराठी मनोरंजनसृष्टीत ‘महागुरू’ म्हणून ओळख असलेले Sachin Pilgaonkar हे गेली अनेक दशके अभिनय, दिग्दर्शन, निर्मिती, गायन आणि नृत्य अशा विविध क्षेत्रांत सक्रिय आहेत. बालवयातच त्यांनी चित्रपटसृष्टीत पाऊल टाकलं आणि पुढे हिंदी व मराठी चित्रपटांत ठसा उमटवला.
हिंदीतील ‘नदिया के पार’, ‘बालिका वधू’, ‘पारध’, ‘बचपन’, ‘ब्रह्मचारी’, ‘सत्ते पे सत्ता’ यांसारख्या चित्रपटांपासून ते मराठीतील ‘अशीही बनवा बनवी’, ‘नवरा माझा नवसाचा’, ‘आयत्या घरात घरोबा’ अशा गाजलेल्या सिनेमांमध्ये त्यांनी लक्षवेधी भूमिका साकारल्या आहेत. मुलाखतींमध्ये ते त्यांच्या कारकिर्दीतील आठवणी सांगताना दिसतात; मात्र याच गोष्टींवरून त्यांना सोशल मीडियावर अनेकदा ट्रोलिंगला सामोरं जावं लागतं.
याच पार्श्वभूमीवर अभिनेते गिरीश ओक यांनी अलीकडील मुलाखतीत स्पष्ट शब्दांत भूमिका मांडली. ऑनलाइन ट्रोलिंगबद्दल बोलताना त्यांनी टीकाकारांवर कडक शब्दांत टीका केली. “कमेंट करणं आणि ट्रोल करणं हा काही लोकांचा उद्योग झाला आहे. चेहरा नसलेली ही माणसं विनाकारण प्रतिक्रिया देतात. शेकडो वाईट कमेंट्समुळे एखादी व्यक्ती मानसिकदृष्ट्या अस्वस्थ होऊ शकते,” असं त्यांनी नमूद केलं.
सचिन पिळगावकरांविषयी सुरू असलेल्या ट्रोलिंगचा उल्लेख करत ओक म्हणाले की, सातव्या वर्षापासून काम करणाऱ्या कलाकाराच्या अनुभवांची खिल्ली उडवणं योग्य नाही. त्यांच्या आयुष्यात मोठ्या दिग्गज कलाकारांशी ओळखी आणि अनेक आठवणी असणं स्वाभाविक आहे. पण जाणीवपूर्वक चेष्टा करण्यासाठी काही लोक काहीही बोलत आहेत, असं त्यांनी स्पष्ट केलं.
“एखाद्याचं वय, अनुभव आणि योगदान याचा विचार न करता ट्रोलिंग करणं योग्य नाही. अशा टीकेचा एखाद्यावर भावनिक परिणाम होऊ शकतो, याची जाणीव लोकांनी ठेवायला हवी,” असा इशाराही गिरीश ओक यांनी दिला.
