रत्नागिरी जिल्ह्यात आज पहाटेपासून पावसाने पुन्हा एकदा जोरदार हजेरी लावली असून अनेक भागांमध्ये मुसळधार सरी कोसळत आहेत. काल दुपारनंतर काही काळ पावसाचा जोर कमी झाल्याने वातावरणात काहीशी उसंत मिळाल्याचे चित्र होते. मात्र, आज सकाळीच पावसाने वेग घेतल्याने जनजीवनावर त्याचा परिणाम जाणवू लागला आहे. हवामान विभागाने जिल्ह्यासाठी यलो अलर्ट जारी केला असला तरी अनेक ठिकाणी अपेक्षेपेक्षा अधिक तीव्र पावसाची नोंद होत आहे.
रत्नागिरी, चिपळूण, राजापूर, लांजा आणि संगमेश्वर तालुक्यांमध्ये सध्या जोरदार पाऊस सुरू असून ढगाळ वातावरण आणि सततच्या सरींमुळे नागरिकांना आवश्यक ती खबरदारी घेण्याचे आवाहन करण्यात आले आहे. गेल्या २४ तासांत जिल्ह्यात सरासरी २८ मिमी पावसाची नोंद झाली असून काही भागांमध्ये तब्बल ४३ मिमी पाऊस पडल्याचे नोंदविण्यात आले आहे. त्यामुळे नद्या, नाले आणि खाड्यांमधील पाण्याची पातळी वाढण्याची शक्यता निर्माण झाली आहे.
किनारपट्टी भागातही पावसाचा जोर कायम असून समुद्र खवळलेला आहे. त्यामुळे मच्छीमारांनी समुद्रात जाणे टाळावे, असा इशारा प्रशासनाने दिला आहे. हवामान विभागाच्या अंदाजानुसार, पुढील काही तास जिल्ह्यात पावसाचा जोर कायम राहण्याची शक्यता असून नागरिकांनी सतर्क राहण्याचे आवाहन करण्यात आले आहे.
