७६ व्या वर्षी नानांनी मारले धडाधड डिप्स; फिटनेस पाहून शिल्पा शेट्टीसह तरुण कलाकारही झाले थक्क
आपल्या अभिनयाने आणि कडक आवाजाने सिनेसृष्टी गाजवणारे ज्येष्ठ अभिनेते नाना पाटेकर सध्या त्यांच्या एका वेगळ्याच अंदाजामुळे चर्चेत आले आहेत. वय वर्षे ७६ असूनही नानांचा फिटनेस कोणत्याही तरुणाला लाजवेल असा आहे. प्रसिद्ध फोटोग्राफर अतुल कस्बेकर यांनी सोशल मीडियावर नानांचा एक व्हिडिओ शेअर केला असून, त्यात ते अत्यंत कठीण समजले जाणारे ‘ट्रायसेप डिप्स’ अतिशय सहजतेने मारताना दिसत आहेत. गळ्यात साधा गमछा आणि साध्या वेशभूषेत असलेल्या नानांनी १५ डिप्स पूर्ण केले, तेव्हा त्यांच्या चेहऱ्यावर थकव्याचा लवलेशही नव्हता. हा व्हिडिओ पाहून नेटकऱ्यांनी “नानांनी तर पुतिन यांनाही मागे टाकले,” अशा मजेशीर कमेंट्सचा वर्षाव केला आहे.
अतुल कस्बेकर यांनी हा व्हिडिओ पोस्ट करताना नानांना आपले ‘फिटनेस गोल’ म्हटले आहे. या व्हिडिओवर बॉलिवूडची फिटनेस क्वीन शिल्पा शेट्टी आणि अभिनेत्री तेजश्री प्रधान यांनीही टाळ्या वाजवून नानांच्या उत्साहाचे कौतुक केले आहे. ७६ व्या वर्षीही इतकी ऊर्जा आणि लवचिकता राखणे ही अनेकांसाठी आश्चर्याची आणि प्रेरणेची बाब ठरली आहे. नुकतेच ‘ओ रोमियो’ आणि ‘हाऊसफुल ५’ सारख्या चित्रपटांत दिसलेले नाना पाटेकर आपल्या शिस्तबद्ध आयुष्यामुळे आजही तितकेच सक्रिय आहेत, हेच या व्हिडिओतून सिद्ध झाले आहे. शरीराची ही कमालीची लवचिकता पाहून नाना खऱ्या अर्थाने ‘दिग्गज’ असल्याचे पुन्हा एकदा अधोरेखित झाले आहे.
