मराठी पत्रकारितेत आपल्या प्रभावी लेखनशैलीसाठी ओळखले जाणारे ज्येष्ठ पत्रकार चंद्रशेखर उर्फ चंदू कुलकर्णी यांचे मंगळवारी वयाच्या 61 व्या वर्षी निधन झाले. होमी भाभा विज्ञान शिक्षण संस्थेचे संस्थापक शास्त्रज्ञ आणि विज्ञान लेखक प्रा. वि. गो. कुलकर्णी यांचे ते सुपुत्र होते. त्यांच्या निधनामुळे पत्रकारिता क्षेत्रात मोठी पोकळी निर्माण झाल्याची भावना व्यक्त होत असून सर्वत्र शोक व्यक्त केला जात आहे. त्यांचा जन्म 3 मार्च 1965 रोजी झाला होता आणि त्यांनी 1985 मध्ये नवशक्तीमधून पत्रकारितेची सुरुवात केली. त्यानंतर ते ‘सकाळ’ आणि ‘महाराष्ट्र टाईम्स’सारख्या प्रमुख दैनिकांमध्ये कार्यरत राहिले. पुढे त्यांनी ‘लोकसत्ता’, ‘सकाळ’ आणि ‘लोकमत’ समूहात संपादकीय जबाबदाऱ्या सांभाळल्या.
त्यांच्या ‘चटकदार’ या लोकप्रिय सदराने वाचकांमध्ये विशेष लोकप्रियता मिळवली, तसेच शिक्षण आणि भ्रष्टाचाराशी संबंधित विषयांवरील त्यांच्या शोध पत्रकारितेला मोठी दाद मिळाली. तुरुंगातील कथित गैरप्रकार उघड करणाऱ्या त्यांच्या रिपोर्टिंगसाठी त्यांना यमुनाबाई खाडीलकर शोध पत्रकारिता पुरस्कारही मिळाला होता. विज्ञान आणि शिक्षण क्षेत्रातही त्यांचे योगदान उल्लेखनीय होते. त्यांच्या पार्थिवावर 1 जुलै रोजी अंत्यसंस्कार करण्यात येणार आहेत.
