भोंदूगिरी आणि फसवणुकीच्या आरोपांखाली अटकेत असलेल्या अशोक खरात याच्या प्रकरणात आणखी एक धक्कादायक माहिती समोर आली आहे. महिलांचे शोषण आणि आर्थिक फसवणूक यांसारख्या गंभीर आरोपांनंतर आता त्याच्या आर्थिक व्यवहारांचे नवे धागेदोरे उलगडू लागले आहेत.
तपासादरम्यान नाशिक जिल्ह्यातील सिन्नर येथे असलेल्या एका पतसंस्थेशी संबंधित मोठा गैरव्यवहार समोर आला आहे. माहितीनुसार, जगदंबा ग्रामीण बिगरशेती पतसंस्थेत खरातच्या नावावर तब्बल ३२ बनावट खाती उघडण्यात आली होती. या खात्यांच्या माध्यमातून सुमारे ५७ लाख ९० हजार रुपयांची फसवणूक केल्याचा आरोप आहे.
हे प्रकरण केवळ एका संस्थेपुरते मर्यादित नसून, खरातचे इतर अनेक पतसंस्थांमध्येही अवैध व्यवहार असल्याचे प्राथमिक तपासात दिसून आले आहे. समता पतसंस्थेसह विविध संस्थांमध्ये त्याने बनावट कागदपत्रांच्या आधारे व्यवहार केल्याची शक्यता व्यक्त केली जात आहे.
या प्रकरणात केवळ अशोक खरातच नव्हे, तर संबंधित पतसंस्थेच्या संचालक मंडळावरही गुन्हा दाखल करण्यात आला आहे. यामुळे या घोटाळ्याचे स्वरूप अधिक व्यापक असल्याचे स्पष्ट होत आहे. तपास यंत्रणा आता या सर्व व्यवहारांची सखोल चौकशी करत असून, यात आणखी किती लोकांचा सहभाग आहे, याचा शोध घेतला जात आहे.
अशोक खरातच्या एकामागोमाग उघड होत असलेल्या कारनाम्यांमुळे राज्यभरात खळबळ उडाली आहे. त्याने केवळ व्यक्तींची फसवणूक केली नाही, तर संस्थात्मक पातळीवरही मोठा आर्थिक गैरव्यवहार केल्याचे समोर येत आहे.
या प्रकरणामुळे पतसंस्थांच्या कामकाजावरही प्रश्नचिन्ह निर्माण झाले असून, अशा प्रकारच्या फसवणुकीला आळा घालण्यासाठी कडक उपाययोजना करण्याची गरज व्यक्त केली जात आहे. पुढील तपासातून आणखी मोठे खुलासे होण्याची शक्यता आहे.
