नाटक सुरु असतानाही देशातील घडामोडींवर अभिनेत्याची उद्विग्न प्रतिक्रिया; विद्यार्थ्यांसोबत झालेल्या अन्यायाविरुद्ध अनेक दिग्गज कलाकार आले पुढे
देशभर गाजलेल्या ‘नीट’ (NEET) परीक्षा पेपरफुटी प्रकरणाचा मुद्दा सध्या अत्यंत तापला असून, जंतर-मंतरवरील आंदोलनादरम्यान विद्यार्थ्यांवर झालेल्या कारवाईवर सर्वच स्तरातून संताप व्यक्त होत आहे. याच पार्श्वभूमीवर बॉलिवूड अभिनेता नवाजुद्दीन सिद्दीकी याने सोशल मीडियावर एक व्हिडिओ शेअर करत विद्यार्थ्यांच्या बाजूने उघडपणे आपली भूमिका मांडली आहे. सध्या बंगळुरूमध्ये आपल्या ‘नकाब’ या नाटकाच्या प्रयोगासाठी गेलेला नवाजुद्दीन देशातील या परिस्थितीमुळे अत्यंत व्यथित झाला आहे.
व्हिडिओमध्ये बोलताना नवाजुद्दीन म्हणाला की, बंगळुरूमध्ये नाटकाचे प्रयोग सुरू असताना मी बातम्यांमध्ये जे काही पाहत आहे, ते पाहून मला खूप विचित्र आणि वाईट वाटते. एवढी मेहनत करून परीक्षा देणाऱ्या विद्यार्थ्यांना जर स्वतःची फसवणूक झाल्यासारखे वाटत असेल, तर हा त्यांच्यावर झालेला मोठा अन्याय आहे. देशाचा तरुण वर्ग आणि विद्यार्थी हेच आपले भविष्य आहेत, त्यामुळे त्यांना न्याय मिळायला हवा आणि त्यांच्याशी ज्या पद्धतीने वर्तन केले जात आहे, त्यावर तातडीने तोडगा निघणे गरजेचे असल्याचे त्याने स्पष्ट केले.
केवळ नवाजुद्दीन सिद्दीकीच नाही, तर या संपूर्ण प्रकरणावर आणि विद्यार्थी आंदोलनांच्या समर्थनार्थ बॉलिवूडमधील अनेक बडे कलाकार आता पुढे आले आहेत. करीना कपूर, आलिया भट्ट, सारा अली खान, इब्राहिम अली खान, रकुलप्रीत सिंह, भूमी पेडनेकर, सोनाक्षी सिन्हा आणि सलमान खानसह अनेक दिग्गजांनी विद्यार्थ्यांच्या या लढ्याला आपला जाहीर पाठिंबा दर्शवला आहे. आंदोलक विद्यार्थ्यांवर होणाऱ्या लाठीचार्जविरुद्ध आणि न्याय मागणाऱ्या तरुणांच्या बाजूने सिनेसृष्टीतील कलाकारांनी आवाज उठवल्यामुळे हा मुद्दा आता अधिकच ऐरणीवर आला आहे.
