धर्मेंद्र प्रधान यांच्या राजीनाम्यासाठी आंदोलक आक्रमक; संसदेवर मोर्चा काढण्याचा प्रयत्न, दिल्लीतील इंटरनेट सेवा ठप्प आणि सुरक्षेत मोठी वाढ.
NEET परीक्षा वाद आणि पेपरफुटीच्या मुद्द्यावरून दिल्लीतील जंतरमंतरवर सुरू असलेल्या विद्यार्थ्यांच्या आणि ‘कॉकरोच जनता पार्टी’च्या आंदोलनाने आता अत्यंत हिंसक आणि गंभीर रूप धारण केले आहे. देशभरातून हजारो विद्यार्थी दिल्लीत दाखल झाले असून, केंद्रीय शिक्षण मंत्री धर्मेंद्र प्रधान यांच्या राजीनाम्यासाठी आंदोलक पूर्णपणे आक्रमक झाले आहेत. काल रात्री आंदोलकांनी पोलिसांना टार्गेट करत त्यांच्यावर थेट हल्ला केला, ज्यामध्ये काही पोलिस अधिकारी जखमी झाले आहेत. आंदोलनाला हिंसक वळण लागल्याने थेट संसदेवर मोर्चा नेण्याचा प्रयत्न करण्यात आला, ज्यामुळे संसद परिसर आणि मंत्र्यांच्या घराभोवती सुरक्षा व्यवस्था कडक करण्यात आली आहे. पंतप्रधान नरेंद्र मोदी यांनी हे प्रकरण फास्ट-ट्रॅक कोर्टात चालवण्याचे स्पष्ट केले असले, तरी आंदोलक मंत्र्यांच्या राजीनाम्याशिवाय मागे हटण्यास तयार नाहीत.
दिल्लीत दिवसेंदिवस वाढणारी गर्दी आणि आंदोलकांचा आक्रमक पवित्रा पोलिसांसाठी डोकेदुखी ठरत असून, काही आंदोलकांकडून चक्क “बांगलादेशमध्ये जे घडले, तीच पुनरावृत्ती इथे होईल,” असे प्रक्षोभक उच्चारले जात असल्याने गंभीर प्रश्न उपस्थित होत आहेत. त्यातच पाकिस्तानच्या काही सोशल मीडिया अकाउंट्सवरून तरुणांची माथी भडकवणारे आणि वाद निर्माण करणारे व्हिडिओ व्हायरल होत असल्याचा प्रकार समोर आला आहे. कोणत्याही प्रकारच्या अफवा, भडकावू भाषणे आणि समाजमाध्यमांवरून पसरणाऱ्या हिंसाचाराला आळा घालण्यासाठी प्रशासनाने दिल्लीतील इंटरनेट सेवा तातडीने बंद करण्याचा अत्यंत मोठा आणि कठोर निर्णय घेतला आहे. सध्या संसदेचे पावसाळी अधिवेशन सुरू असून, संपूर्ण दिल्लीत पोलिस आणि यंत्रणा हाय अलर्ट मोडवर आहेत. एका बाजूला विद्यार्थ्यांचे भविष्य आणि रोष तर दुसऱ्या बाजूला हिंसक होत चाललेले आंदोलन यामुळे देशाच्या राजकारणात प्रचंड खळबळ उडाली आहे.
