ठाणे जिल्ह्यातील बदलापूर येथे एका विवाहित महिलेच्या संशयास्पद मृत्यू प्रकरणात मोठा खुलासा झाला असून, सुरुवातीला नैसर्गिक मृत्यू मानल्या गेलेल्या घटनेचे रूपांतर आता खून प्रकरणात झाले आहे. प्राजक्ता मेहेर या महिलेचा मृत्यू हृदयविकाराच्या झटक्यामुळे झाल्याचे सांगण्यात आले होते. मात्र शवविच्छेदन अहवालात तिचा मृत्यू नाक आणि तोंड दाबून गुदमरवल्यामुळे झाल्याचे स्पष्ट झाल्यानंतर पोलिसांनी पती योगेश मेहेर आणि सासू अरुणा मेहेर यांना अटक केली आहे.
प्राजक्ता यांचा विवाह २०१० मध्ये बदलापूरमधील एरंजाड गावातील योगेश मेहेर यांच्याशी झाला होता. त्यांना दोन मुले असून बाहेरून सर्व काही सुरळीत दिसत असले तरी कौटुंबिक वाद सुरू असल्याचा आरोप प्राजक्ताच्या कुटुंबीयांनी केला आहे. योगेशचे एका अन्य महिलेशी कथित प्रेमसंबंध असल्याने तो पत्नीवर घटस्फोटासाठी दबाव टाकत होता, असा दावा कुटुंबीयांनी केला आहे. याच पार्श्वभूमीवर प्राजक्ताच्या मृत्यूबाबत संशय व्यक्त करण्यात आला होता.
एप्रिल महिन्यात पती-पत्नीमध्ये वाद झाल्यानंतर दुसऱ्याच दिवशी प्राजक्ताचा मृत्यू झाल्याची माहिती तिच्या माहेरच्यांना देण्यात आली होती. सुरुवातीला अकस्मात मृत्यूची नोंद करण्यात आली होती. मात्र कुटुंबीयांनी संशय व्यक्त केल्यामुळे शवविच्छेदनासाठी नमुने तपासणीसाठी पाठविण्यात आले. त्यानंतर प्राप्त झालेल्या पोस्टमॉर्टम आणि व्हिसेरा अहवालात मृत्यू नैसर्गिक नसल्याचे निष्पन्न झाले.
या निष्कर्षानंतर बदलापूर पश्चिम पोलिसांनी खुनाचा गुन्हा दाखल करून पती आणि सासूला अटक केली आहे. दरम्यान, या प्रकरणात इतर संबंधित व्यक्तींचाही सहभाग असल्याचा संशय व्यक्त करत त्यांच्यावरही कारवाई करण्याची मागणी मृत महिलेच्या कुटुंबीयांनी केली आहे. पोलिसांकडून सर्व पुरावे आणि घटनाक्रमाची सखोल तपासणी सुरू असून तपासाच्या पुढील टप्प्यात आणखी माहिती समोर येण्याची शक्यता आहे.
