आर्थिक वर्ष २०२५-२६ साठी ८.२५% व्याजदराला मंजुरी; कोट्यवधी नोकरदारांच्या खात्यात या महिन्याअखेर रक्कम जमा होणार
नोकरदार वर्गासाठी एक अत्यंत दिलासादायक आणि महत्त्वाची बातमी समोर आली आहे. केंद्रीय भविष्य निर्वाह निधी संघटना (EPFO) आपल्या सेवांमध्ये आमूलाग्र बदल करत ‘ईपीएफओ ३.०’ ही नवी डिजिटल प्रणाली लागू करण्याच्या तयारीत आहे. या अंतर्गत, पीएफ खातेदारांना आता त्यांचे पैसे काढण्यासाठी कार्यालयाचे उंबरठे झिजवावे लागणार नाहीत किंवा कागदपत्रांच्या प्रदीर्घ प्रक्रियेची वाट पाहावी लागणार नाही. नव्या नियमांनुसार, सभासद आता थेट एटीएम (ATM) आणि यूपीआय (UPI) चा वापर करून काही सेकंदांत आपल्या खात्यातील ठरावीक रक्कम (सुमारे ५०% ते ७५% पर्यंत) सहज काढू शकतील. या पेपरलेस सुविधेमुळे क्लेम सेटलमेंटचा वेळ कमालीचा कमी होणार आहे.
या डिजिटल क्रांतीसोबतच पीएफ खातेदारांसाठी आणखी एक मोठी गूड न्यूज आहे. केंद्र सरकारने आर्थिक वर्ष २०२५-२६ साठी ८.२५ टक्के व्याजदर निश्चित केला असून, केंद्रीय वित्त मंत्रालयाने या दराला अधिकृत मंजुरी दिली आहे. २ मार्च २०२६ रोजी केंद्रीय कामगार आणि रोजगार मंत्री मनसूख मांडवीय यांच्या अध्यक्षतेखाली झालेल्या बैठकीत या व्याजदराची शिफारस करण्यात आली होती. सरकारच्या या अंतिम मंजुरीनंतर, आता चालू महिन्याअखेर म्हणजेच जून २०२६ मध्येच ७ कोटींपेक्षा जास्त सभासदांच्या खात्यात व्याजाचे पैसे थेट जमा होण्यास सुरुवात होईल.
ईपीएफ योजना १९५२ च्या नियम ६० नुसार, पीएफ खात्यातील व्याजाची गणना दरमहा खात्यात असणाऱ्या शिल्लक रकमेवर (मासिक चालू रक्कम) केली जाते आणि आर्थिक वर्षाच्या शेवटी ती खात्यात जमा होते. जर एखाद्या खातेदाराने वर्षाच्या दरम्यान काही रक्कम काढली, तर उर्वरित शिल्लक रकमेवरच व्याज दिले जाते. विशेष म्हणजे, ईपीएफओने गेल्या काही वर्षांतील व्याजदरांमध्ये सातत्य राखले आहे; चालू वर्षासह सलग तिसऱ्या वर्षी हा दर ८.२५% वर स्थिर आहे.
गेल्या ५ वर्षांतील ईपीएफ व्याजदराचा आढावा:
- २०२५-२६: ८.२५% (नुकतीच मंजुरी)
- २०२४-२५: ८.२५%
- २०२३-२४: ८.२५%
- २०२२-२३: ८.१५%
- २०२१-२२: ८.१०%
- २०२०-२१: ८.५०%
