विमाननगरच्या फिनिक्स मॉलमध्ये सुरक्षेचे वाजले तीन-तेरा; चाहत्यांच्या धक्काबुक्कीमुळे घाबरलेल्या कलाकारांनी कसाबसा काढला पळ
सांस्कृतिक राजधानी आणि शिस्तीसाठी ओळखल्या जाणाऱ्या पुणे शहरात एक अत्यंत धक्कादायक आणि लाजिरवाणी घटना समोर आली आहे. पुण्यातील विमाननगर परिसरात असलेल्या प्रसिद्ध फिनिक्स मॉलमध्ये बॉलिवूडचे लोकप्रिय स्टार्स शाहिद कपूर, रश्मिका मंदाना आणि क्रिती सॅनन यांना चाहत्यांच्या अतिउत्साहाचा आणि हुल्लडबाजीचा भयंकर फटका बसला. एका प्रमोशनल कार्यक्रमासाठी हे तिन्ही स्टार्स पुण्यात आले होते, मात्र येथील ढिसाळ नियोजनामुळे सुरक्षा यंत्रणा पूर्णपणे कोलमडली आणि कलाकारांना थेट धक्काबुक्कीला सामोरे जावे लागले. या गोंधळात काही चाहत्यांना दुखापत झाल्याचीही प्राथमिक माहिती आहे.
मॅडॉक फिल्म्सच्या वतीने आयोजित करण्यात आलेल्या या कार्यक्रमासाठी कोणतीही तिकिटे किंवा पासेस ठेवण्यात आले नव्हते. कार्यक्रम सर्वांसाठी खुला असल्याने आपल्या लाडक्या कलाकारांना प्रत्यक्ष पाहण्यासाठी पुणेकरांनी मॉलमध्ये अभूतपूर्व गर्दी केली होती. महिला, तरुण-तरुणी आणि लहान मुलांसह हजारो लोक मॉलमध्ये जमले होते. मात्र, जसेही शाहिद, रश्मिका आणि क्रिती मंचावर दाखल झाले, तसा गर्दीचा उत्साह अनावर झाला. काही हुल्लडबाजांनी थेट मंचाच्या दिशेने धाव घेण्यास सुरुवात केली, ज्यामुळे तिथे एकच खळबळ उडाली.
सुरक्षेसाठी लावलेले लोखंडी बॅरिकेड्स तोडून झुंडशाही करत लोक कलाकारांच्या अगदी जवळ पोहोचले. बाऊन्सर्स आणि मॉलच्या सुरक्षा रक्षकांनी गर्दीला रोखण्याचा आटोकाट प्रयत्न केला, पण अथांग जनसमुदायापुढे त्यांचे प्रयत्न अपुरे पडले. लोक थेट कलाकारांच्या अंगावर धावून जात असल्याने मंचावर प्रचंड भीतीचे वातावरण निर्माण झाले. सुरक्षेचे पार तीन-तेरा वाजल्याने कलाकारांना स्वतःचा बचाव करणे कठीण झाले होते. अखेर, कोणतीही गंभीर दुर्घटना किंवा अनर्थ टाळण्यासाठी आयोजकांनी तातडीने हा कार्यक्रम रद्द करत असल्याचे जाहीर केले.
परिस्थिती हाताबाहेर गेल्याचे लक्षात येताच सुरक्षारक्षकांच्या गराड्यात या तिन्ही स्टार्सनी तिथून कसाबसा पळ काढला. मात्र, तरीही वेडे झालेले चाहते त्यांच्या गाडीपर्यंत त्यांच्या मागे धावत होते. पुण्याच्या या दौऱ्यात शाहिद, रश्मिका आणि क्रिती सॅनन यांना अत्यंत वाईट आणि भयानक अनुभव आला. या घटनेनंतर मोठ्या कार्यक्रमांचे आयोजन करताना सुरक्षेची पुरेशी काळजी न घेणाऱ्या आयोजकांच्या ढिसाळ नियोजनावर आता कडाडून टीका होत आहे.
