२०१७ ची गुंतवणूक ठरली फायदेशीर; ३५ व्या मजल्यावरील घरांच्या व्यवहारासाठी लाखो रुपयांची स्टॅम्प ड्युटी
बॉलिवूडचा ‘खिलाडी’ अर्थात अभिनेता अक्षय कुमार हा केवळ चित्रपटांमधील त्याच्या दमदार अभिनयासाठीच नाही, तर त्याच्या तल्लख आर्थिक नियोजनासाठीही ओळखला जातो. सध्या अक्षय कुमार कोणत्याही नव्या चित्रपटामुळे नव्हे, तर रिअल इस्टेटमधील एका मोठ्या व्यवहारामुळे चर्चेत आला आहे. मुंबईतील बोरिवली पूर्व भागात असलेल्या आपल्या दोन आलिशान फ्लॅट्सची विक्री करून अभिनेत्याने तब्बल दुप्पट नफा कमावला आहे.
मिळालेल्या माहितीनुसार, अक्षय कुमारने बोरिवली पूर्वेकडील नामांकित ‘ओबेरॉय स्काय सिटी’ या इमारतीच्या ३५ व्या मजल्यावरील दोन फ्लॅट्स सुवर्णा रुपेशकुमार सकपाळ यांना विकले आहेत.
असा झाला कोट्यवधींचा फायदा
अक्षय कुमारने हे दोन्ही फ्लॅट्स २०१७ मध्ये खरेदी केले होते. गेल्या ९ वर्षांत या मालमत्तेच्या किमतीत प्रचंड वाढ झाल्याने अभिनेत्याला मोठा आर्थिक फायदा झाला आहे:
- खरेदी किंमत (२०१७): सुमारे ३.६८ कोटी रुपये
- विक्री किंमत (२०२६): तब्बल ७.१० कोटी रुपये
- एकूण नफा: जवळपास ९१ टक्क्यांहून अधिक नफा मिळवत अभिनेत्याने ही डील फायनल केली आहे.
या व्यवहारासाठी एकूण ३५ लाख ५० हजार रुपये स्टॅम्प ड्युटी (मुद्रांक शुल्क) भरण्यात आली आहे. यात फ्लॅट क्रमांक ३५०३ साठी ६ लाख ७५ हजार रुपये, तर मोठ्या आकाराच्या फ्लॅट क्रमांक ३५०४ साठी २८ लाख ७५ हजार रुपयांच्या स्टॅम्प ड्युटीचा समावेश आहे.
२५०० कोटींचे साम्राज्य आणि रॉयल लाईफस्टाईल
गेल्या ३५ वर्षांहून अधिक काळ बॉलिवूडवर राज्य करणाऱ्या अक्षय कुमारचे नाव आज सर्वाधिक मानधन घेणाऱ्या आणि सर्वाधिक कर (Tax) भरणार्या अभिनेत्यांच्या यादीत आघाडीवर आहे. एका चित्रपटासाठी अंदाजे ९० कोटी रुपये घेणाऱ्या अक्षयची एकूण संपत्ती (Net Worth) आज २५०० कोटी रुपयांच्या घरात आहे.
अक्षय कुमारची आलिशान मालमत्ता:*
- मुंबईतील निवासस्थान: जुहू येथील ८० कोटी रुपयांचा भव्य सी-फेसिंग बंगला.
- परदेशातील मालमत्ता: गोव्यासह मॉरिशस आणि कॅनडा येथेही आलिशान आणि भव्य प्रॉपर्टीज.
आपल्या शिस्तबद्ध जीवनशैलीसाठी प्रसिद्ध असलेला अक्षय कुमार चित्रपटांसोबतच रिअल इस्टेटमध्येही आपले साम्राज्य कसे वाढवतोय, हेच या नवीन व्यवहारावरून पुन्हा एकदा स्पष्ट झाले आहे.
