पुण्यश्लोक राजमाता अहिल्यादेवी होळकर यांच्या ३०१ व्या जयंतीनिमित्त चौंडी येथे आयोजित कार्यक्रमात राज्याचे कृषिमंत्री दत्तात्रय भरणे यांनी शेतकऱ्यांसाठी महत्त्वपूर्ण घोषणा केली. राज्य सरकारने अहिल्यादेवी होळकर यांच्या नावाने शेतकरी कर्जमाफीचा निर्णय घेतला असून, येत्या काही दिवसांत त्याची अंमलबजावणी करण्यात येणार असल्याचे त्यांनी सांगितले.
कार्यक्रमात बोलताना भरणे यांनी सांगितले की, राज्यातील शेतकऱ्यांना दिलासा देण्यासाठी सरकार सकारात्मक पावले उचलत आहे. कर्जमाफीसंदर्भातील प्रक्रिया अंतिम टप्प्यात असून, पुढील आठ ते दहा दिवसांत याबाबतची कार्यवाही पूर्ण होईल, असा विश्वास त्यांनी व्यक्त केला. यामुळे शेतकरी वर्गात आशेचे वातावरण निर्माण झाले आहे.
यावेळी त्यांनी अहिल्यादेवी होळकर यांच्या कार्याचा गौरव करत त्यांच्या जलसंधारण आणि लोककल्याणकारी धोरणांचा उल्लेख केला. चौंडी आणि परिसराच्या सर्वांगीण विकासासाठी सुमारे १२०० ते १३०० कोटी रुपयांचा आराखडा तयार करण्यात आल्याची माहितीही त्यांनी दिली. पुढील काही वर्षांत या भागात मोठ्या प्रमाणावर विकासकामे राबवली जाणार असल्याचे त्यांनी स्पष्ट केले.
तसेच धनगर समाजातील युवक आणि मेंढपाळ बांधवांसाठी कृषी विभागामार्फत विशेष योजना आणण्याचे प्रयत्न सुरू असल्याचेही त्यांनी सांगितले. या योजनेमुळे समाजातील तरुणांना रोजगार आणि आर्थिक बळकटी मिळण्यास मदत होईल, असा विश्वास त्यांनी व्यक्त केला. कार्यक्रमाला मुख्यमंत्री, उपमुख्यमंत्री तसेच विविध क्षेत्रांतील मान्यवरांची उपस्थिती होती.
