मुंबईतील वांद्रे पूर्व रेल्वे स्थानकाजवळील गरीब नगर परिसरात रेल्वे प्रशासनाने सुरू केलेली अतिक्रमण हटाव मोहीम दुसऱ्या दिवशीही कायम राहिली. उच्च न्यायालयाच्या आदेशानुसार रेल्वेच्या मालकीच्या जागेवरील अनधिकृत बांधकामांवर मोठ्या प्रमाणावर कारवाई करण्यात येत असून, सहा बुलडोझरच्या मदतीने झोपड्या आणि इतर बांधकामे हटवण्याचे काम सुरू आहे.
या कारवाईदरम्यान रेल्वे मार्गालगत उभारण्यात आलेल्या तीन ते चार मजली झोपड्या, पत्र्याची घरे तसेच काही व्यावसायिक गाळे पाडण्यात येत आहेत. रेल्वे प्रशासनाच्या म्हणण्यानुसार, या अतिक्रमणांमुळे रेल्वे वाहतुकीवर परिणाम होत असून प्रवाशांच्या सुरक्षेलाही धोका निर्माण होत होता. अनेक वेळा नोटिसा देऊनही अतिक्रमण हटवण्यात आले नसल्याने अखेर न्यायालयाच्या निर्देशानुसार कठोर पावले उचलण्यात आल्याचे अधिकाऱ्यांनी स्पष्ट केले.
कारवाईदरम्यान कोणताही अनुचित प्रकार घडू नये यासाठी परिसरात मोठा पोलीस बंदोबस्त ठेवण्यात आला आहे. रेल्वे सुरक्षा दल, स्थानिक पोलीस, महापालिका प्रशासन आणि रेल्वे विभागाचे अधिकारी संयुक्तपणे ही मोहीम राबवत आहेत. काही ठिकाणी नागरिकांनी कारवाईला विरोध करण्याचा प्रयत्न केला, मात्र पोलिसांनी परिस्थिती नियंत्रणात ठेवली.
दरम्यान, घरांवर बुलडोझर चालवल्यामुळे स्थानिक नागरिकांमध्ये संतापाचे वातावरण निर्माण झाले आहे. “आम्हाला पर्यायी जागा उपलब्ध करून द्या आणि त्यानंतरच कारवाई करा,” अशी मागणी रहिवाशांकडून करण्यात येत आहे. अनेक कुटुंबे बेघर होण्याच्या भीतीत असून परिसरात तणावपूर्ण वातावरण कायम आहे.
या कारवाईचा परिणाम वाहतुकीवरही झाला असून, वांद्रे पूर्व परिसरातील दोन रेल्वे पूल तात्पुरते बंद ठेवण्यात आले आहेत. त्यामुळे नागरिकांना मोठ्या अडचणींचा सामना करावा लागत आहे. प्रशासनाची कारवाई आणि स्थानिकांचा विरोध यामुळे संपूर्ण परिसरात तणावाचे वातावरण निर्माण झाले आहे.
