उन्हाळ्याच्या दिवसांत वाढते तापमान, घाम, धूळ आणि प्रदूषणामुळे त्वचेच्या अनेक समस्या निर्माण होतात. त्वचा कोरडी पडणे, चेहऱ्यावर अतिरिक्त तेलकटपणा येणे, टॅनिंग वाढणे आणि चेहरा निस्तेज दिसणे अशा तक्रारी अनेकांना जाणवतात. अशावेळी महागडी सौंदर्यप्रसाधने वापरण्याऐवजी घरच्या घरी तयार होणारे गुलाबपाण्याचे आईस क्यूब्स त्वचेसाठी अत्यंत फायदेशीर ठरू शकतात. सध्या सोशल मीडियावरही हा नैसर्गिक स्किन केअर उपाय मोठ्या प्रमाणात चर्चेत आहे.
गुलाबपाण्याचे आईस क्यूब्स तयार करण्यासाठी फारशी मेहनत लागत नाही. यासाठी एक कप शुद्ध गुलाबपाणी, एक आईस ट्रे आणि काही ताज्या गुलाबाच्या पाकळ्या लागतात. सर्वप्रथम आईस ट्रेमध्ये गुलाबपाणी भरावे आणि प्रत्येक कप्प्यात गुलाबाच्या पाकळ्या टाकाव्यात. त्यानंतर ट्रे ५ ते ६ तास फ्रीझरमध्ये ठेवावा. क्यूब्स पूर्णपणे गोठल्यानंतर ते वापरण्यास तयार होतात.
हे आईस क्यूब्स वापरताना ते हलक्या हाताने चेहऱ्यावर गोलाकार पद्धतीने फिरवावेत. कपाळ, गाल आणि डोळ्यांच्या आसपास हलक्या हाताने मसाज केल्यास त्वचेला थंडावा मिळतो. साधारण एक ते दोन मिनिटे मसाज केल्यानंतर चेहरा नैसर्गिकरित्या सुकू द्यावा आणि त्यानंतर मॉइश्चरायझर लावावे. सकाळी किंवा मेकअपपूर्वी हे क्यूब्स वापरल्यास त्वचा अधिक फ्रेश, स्मूथ आणि चमकदार दिसू शकते.
गुलाबपाण्यामध्ये त्वचेला शांत आणि ताजेतवाने ठेवणारे गुणधर्म असतात. त्यामुळे चेहऱ्यावरील थकवा कमी होण्यास मदत होते. डोळ्यांखालील सूज कमी करण्यासाठीही हे उपयुक्त मानले जाते. तसेच उन्हामुळे होणारी जळजळ कमी करण्यास आणि त्वचेला नैसर्गिक टाईटनिंग इफेक्ट देण्यासही हे क्यूब्स मदत करतात. नियमित वापरामुळे त्वचा अधिक निरोगी आणि तजेलदार दिसू शकते.
