वेग मंदावला आणि दहशतही संपली; ४४% स्लोअर चेंडूंचा फटका बुमराहलाच बसला, फलंदाज आता बिनधास्त!
मुंबई इंडियन्सचा सर्वात मोठा ‘मॅच विनर’ मानला जाणारा जसप्रीत बुमराह सध्या कारकिर्दीतील सर्वात वाईट टप्प्यातून जात आहे. आयपीएल २०२६ च्या हंगामात आतापर्यंत मुंबईचे पाच सामने झाले आहेत, मात्र धक्कादायक बाब म्हणजे बुमराहला या पाचही सामन्यांत मिळून एकही बळी (विकेट) मिळवता आलेला नाही. पंजाब किंग्स, आरसीबी, राजस्थान रॉयल्स, दिल्ली कॅपिटल्स आणि केकेआर यांसारख्या तगड्या संघांविरुद्ध बुमराह पूर्णपणे निष्प्रभ ठरला आहे. ज्या गोलंदाजाचे नाव ऐकताच जागतिक क्रिकेटमधील दिग्गज फलंदाज कापायचे, तोच बुमराह आता विकेटसाठी आसुसलेला दिसत आहे. पाच सामन्यांत त्याने १६४ धावा दिल्या असून, ८.६३ च्या इकॉनमी रेटने गोलंदाजी केली आहे. जरी हा इकॉनमी रेट टी-२० च्या दृष्टीने वाईट नसला, तरी बुमराहकडून असलेल्या ‘विकेट टेकिंग’ अपेक्षा पूर्ण होत नसल्याने मुंबई इंडियन्सचे व्यवस्थापन प्रचंड चिंतेत आहे.
बुमराहच्या या अपयशामागे त्याच्या गोलंदाजीच्या शैलीत झालेला बदल प्रामुख्याने कारणीभूत असल्याचे तज्ज्ञांचे मत आहे. या हंगामात बुमराहने आपल्या वेगापेक्षा स्लोअर चेंडूवर (Slower Balls) जास्त भर दिला आहे. आकडेवारीनुसार, त्याने आतापर्यंत टाकलेल्या एकूण चेंडूंपैकी तब्बल ४४ टक्के चेंडू हे स्लोअर आहेत, ज्यामुळे त्याचा सरासरी वेग १३० किमी प्रतितास इतका खाली आला आहे. फलंदाज आता या संथ चेंडूंचा आधीच अंदाज बांधत आहेत आणि बुमराहला निर्भयपणे सामोरे जात आहेत. पूर्वी बुमराहच्या वेगाची धास्ती फलंदाजांना मोठे शॉट्स खेळण्यापासून रोखायची, पण आता तोच आत्मविश्वास फलंदाजांच्या बॅटिंग अप्रोचमध्ये दिसून येत आहे. बुमराहचा हा ‘डाग’ त्याच्या आजवरच्या शानदार कारकिर्दीला काळिमा फासणारा ठरत आहे.
बुमराहच्या या खराब फॉर्मचा थेट परिणाम मुंबई इंडियन्सच्या गुणतालिकेतील स्थानावर झाला आहे. मुख्य स्ट्राइक बॉलरला विकेट मिळत नसल्याने मुंबईला सलग चार पराभवांचा सामना करावा लागला असून, संघ सध्या नवव्या क्रमांकावर फेकला गेला आहे. जोपर्यंत बुमराह पुन्हा एकदा आपल्या जुन्या वेगाचा आणि भेदक यॉर्कर्सचा वापर करून फलंदाजांच्या मनात धडकी भरवत नाही, तोपर्यंत मुंबईच्या विजयाची गाडी रुळावर येणे कठीण दिसत आहे. स्वतःचा आत्मविश्वास परत मिळवण्यासाठी आणि संघाला सावरण्यासाठी बुमराहला लवकरात लवकर विकेट्सचा दुष्काळ संपवावा लागणार आहे.
