पंतप्रधान नरेंद्र मोदी यांनी महिला आरक्षणाच्या मुद्द्यावरून विरोधकांवर जोरदार टीका करत आपली ठाम भूमिका मंडळी आहे. नारी शक्ती अधिनियम दुरुस्ती विधेयक लोकसभेत फेटाळले गेल्यानंतर त्यांनी जनतेला संबोधित करत या पराभवाकडे वेगळ्या दृष्टिकोनातून पाहण्याचे आवाहन केले.
आपल्या भाषणात मोदी यांनी कॉँग्रेसवर थेट निशाणा साधला. महिला सक्षमीकरणाच्या प्रश्नावर विरोधक गंभीर नसल्याचा आरोप करत त्यांनी सत्ताधारी आघाडीचा निर्धार अधोरेखित केला. “काल आमच्याकडे आवश्यक बहुमत नव्हते, पण याचा अर्थ आमचा पराभव झाला असे नाही,” असे ते म्हणाले.
मोदी यांनी स्पष्ट केले की, महिला आरक्षण लागू करण्यासाठी योग्य वेळ आणि आवश्यक संख्याबळ मिळणे महत्त्वाचे आहे. सध्या विधेयक पारित झाले नसले, तरी भविष्यात ते नक्कीच यशस्वी होईल, असा विश्वास त्यांनी व्यक्त केला. त्यांनी सांगितले की भाजप आणि एनडीए यांचा या विषयावरील निर्धार अजिबात ढळलेला नाही.
तसेच, त्यांनी आपल्या पुढील राजकीय रणनीतीबाबतही संकेत दिले. “देशातील नागरिकांच्या अपेक्षा आणि स्वप्न पूर्ण करण्यासाठी आम्ही कटिबद्ध आहोत. संधी मिळताच महिला आरक्षणाचा निर्णय प्रत्यक्षात आणू,” असे त्यांनी ठामपणे सांगितले.
या भाषणातून मोदी यांनी केवळ विरोधकांवर टीका केली नाही, तर आपल्या समर्थकांना प्रेरित करण्याचाही प्रयत्न केला. महिला सक्षमीकरण हा भाजपचा मुख्य अजेंडा राहील आणि त्यासाठी भविष्यात आणखी आक्रमक पावले उचलली जातील, असे संकेत त्यांनी दिले.
या पार्श्वभूमीवर, आगामी काळात महिला आरक्षणाचा मुद्दा पुन्हा एकदा राष्ट्रीय राजकारणाच्या केंद्रस्थानी येण्याची शक्यता व्यक्त केली जात आहे.
