पूर्व विदर्भात सध्या प्रचंड उष्णतेची लाट उसळली असून त्याचा मोठा फटका दैनंदिन जीवनावर पडताना दिसत आहे. विशेषतः गडचिरोली जिल्ह्यात तापमानाने उच्चांक गाठला असून मागील काही दिवसांपासून पारा ४२ ते ४७ अंश सेल्सिअसच्या दरम्यान स्थिरावलेला आहे. या तीव्र उकाड्यामुळे नागरिकांचे दैनंदिन व्यवहार विस्कळीत झाले आहेत.
दुपारच्या वेळी परिस्थिती अधिकच बिकट होत असून रस्त्यांवर शुकशुकाट दिसून येत आहे. गडचिरोली–हैदराबाद राष्ट्रीय महामार्ग हा नेहमी गजबजलेला महामार्गही दुपारच्या वेळेत जवळपास ओस पडलेला दिसतो. अत्यावश्यक कामांशिवाय कोणीही बाहेर पडण्यास टाळाटाळ करत असल्याचे चित्र आहे. उन्हाच्या तीव्रतेमुळे वाहनचालकांनाही प्रवास करताना अडचणींचा सामना करावा लागत आहे.
प्रशासनानेही नागरिकांना सतर्कतेचा इशारा देत दुपारी १२ ते ४ या कालावधीत घराबाहेर पडू नये, असे आवाहन केले आहे. उष्माघाताचा धोका वाढत असल्याने पुरेसे पाणी पिणे, हलके कपडे घालणे आणि सावलीत राहणे यासारख्या सूचना देण्यात येत आहेत. दरम्यान, गडचिरोलीपुरतेच नव्हे तर तेलंगणा आणि छत्तीसगड या शेजारील राज्यांमध्येही उष्णतेचा जोर वाढला आहे. तसेच विदर्भातील गोंदिया, भंडारा आणि चंद्रपूर या जिल्ह्यांमध्येही तापमानाचा पारा सतत चढत आहे.
एकूणच, वाढत्या तापमानामुळे नागरिकांनी आरोग्याची विशेष काळजी घेणे आवश्यक बनले आहे. हवामान विभागाकडून पुढील काही दिवसांतही उष्णतेचा तडाखा कायम राहण्याची शक्यता वर्तवली जात असल्याने सर्वांनी सावध राहण्याची गरज आहे.
