सरपंच देशमुख यांच्या क्रूर हत्येच्या तपासाला अडथळा आणला जात असल्याचा आरोप; दोषींना फाशीचीच मागणी
बीड जिल्ह्यात मागील काही महिन्यांत उघडकीस आलेल्या सलग खुनांच्या घटनांमुळे राजकीय गुन्हेगारीचे कुरूप रूप राज्यासमोर प्रकर्षाने उभे राहिले आहे. औष्णिक वीज केंद्रातील राखेच्या व पवनचक्की कंत्राटाच्या वादातून झालेले खून, तसेच मस्साजोगचे सरपंच संतोष देशमुख यांची निर्घृण हत्या, यांनी संपूर्ण समाज हादरवला. देशमुख यांच्या हत्येचे फोटो–व्हिडिओ बघून सर्वसामान्यजनांमध्ये तीव्र संताप पसरला होता. या घटनेतील अनेक आरोपी राजकीय पक्षांशी संबंधित असल्याचे समोर आले.
देशमुख यांच्या पहिल्या स्मृतीदिनानिमित्त मनोज जरांगे, अंबादास दानवे, आमदार सुरेश धस, संदीप क्षीरसागर आणि खासदार बजरंग सोनवणे आदी नेते उपस्थित होते. यावेळी खासदार सोनवणे यांच्या भाषणातील काही विधानांमुळे मोठी खळबळ उडाली.
सोनवणे म्हणाले की, इतकी अमानुष हत्या इतिहासात क्वचितच पाहायला मिळाली. “फक्त आरोपी अटकेत आहेत म्हणून समाधान नाही; त्यांना शिक्षा—तीही फाशीची—झाली तरच न्याय मिळेल,” असे त्यांनी स्पष्ट सांगितले. संतोष देशमुख हे गावकऱ्यांचे लाडके व बिनविरोध निवडून येण्यासारखे लोकप्रिय नेते होते, असेही त्यांनी नमूद केले.
परंतु सर्वाधिक चर्चेत आलेले विधान म्हणजे “या प्रकरणाचा तपास थांबवला आहे. गृहखात्याने थांबवला की कोणीतरी दुसऱ्याने, हे तपासले गेले पाहिजे.”
या वक्तव्यानंतर तपासावर कोणाचा दबाव आहे याबाबत चर्चा रंगली आहे.
सोनवणे यांनी पुढे मागणी केली की तपासाला ‘कॅप’ घातली आहे ती काढून तपास पूर्णपणे पुढे नेला पाहिजे. “दोषी कोणताही असो—सामान्य वा मोठा—सर्वांवर समान कारवाई झाली पाहिजे,” असे त्यांनी ठामपणे सांगितले. आरोपींना पळून जाण्यास मदत करणाऱ्यांवरही अद्याप कोणती कारवाई झाली नाही, यावरही त्यांनी प्रश्नचिन्ह उपस्थित केले.
धनंजय मुंडे यांना सहआरोपी करण्याची मागणी का उद्भवते, हे गंभीरपणे तपासले पाहिजे, असे सांगत सोनवणे म्हणाले की, “मी आज आरोप करणार नाही; पण तपास थांबवला कोणी हे उघड झाले पाहिजे.” ते पुढे म्हणाले, “मी समाधानी नाही. मुक्त वातावरणात तपास झाला पाहिजे. शेवटच्या टप्प्यापर्यंत सत्य बाहेर आले पाहिजे.”
मनोज जरांगे यांच्या वक्तव्यावर प्रतिक्रिया देताना त्यांनी सांगितले की ते प्रथम संपूर्ण विधान ऐकूनच प्रतिक्रिया देतील. तसेच, “लोकांच्या समस्या असोत किंवा एखाद्या गटाच्या, सत्ताधाऱ्यांकडे कोणत्या प्रकारचे फोन जातात हेही पाहिले पाहिजे,” अशी टीका त्यांनी केली. नगरपालिका निवडणुकांमध्ये लोकांचे प्रेम किती आहे हे स्पष्ट होईल, असेही सोनवणे म्हणाले.
