गुप्तचर संस्थांचा इशारा – तुरुंगावर हल्ल्याचा धोका वाढला
पाकिस्तानचे माजी पंतप्रधान इम्रान खान यांच्या प्रकृतीबाबत चिंताजनक माहिती समोर येत असून त्यांची स्थिती दिवसेंदिवस खालावत चालल्याचे त्यांच्या पक्षीय सूत्रांचे म्हणणे आहे. रावळपिंडीच्या अडियाल तुरुंगात त्यांना अतिशय कठीण आणि अस्वच्छ परिस्थितीत ठेवण्यात आल्याचा आरोप करण्यात येत आहे. इतकेच नव्हे, तर त्यांना अतितीव्र एकांतवासात ठेवून वारंवार शारीरिक त्रासही दिला जात असल्याचा दावा पीटीआयच्या अंतर्गत पदाधिकाऱ्यांनी केला आहे.
गेल्या आठवड्यापासून इम्रान खान यांना त्यांच्या कुटुंबीयांनाही भेटू दिले गेलेले नाही. त्यांची बहीण अलीमा खान यांनी सरकारवर गंभीर प्रश्न उपस्थित करत सांगितले की, जर भेटीला परवानगी दिली असती तर साऱ्या अफवा आपोआप थांबल्या असत्या. त्यांना भीती आहे की इम्रान खान यांना जाणीवपूर्वक इजा केली जाऊ शकते. सरकारच्या या धोरणामुळे पाकिस्तानातील जनतेत तीव्र असंतोष निर्माण होत असल्याचे त्या सांगतात.
पीटीआयच्या सूत्रांनुसार, तुरुंगातील कठोर वातावरण, मानसिक तणाव आणि संवादावर असलेली पूर्ण मर्यादा यामुळे इम्रान खान यांची तब्येत आणखी ढासळत आहे. पूर्वी केपीचे मुख्यमंत्री त्यांना भेटत असत; परंतु आता त्या भेटींनाही बंदी घालण्यात आली आहे. त्यांच्या आरोग्याच्या नावाखाली दिल्या जाणाऱ्या अद्यतनांमधून खरी परिस्थिती लपवली जात असल्याचा दावा त्यांच्या पक्षाने केला आहे.
अलीमा खान यांनी इशारा दिला की परिस्थिती अधिक बिघडल्यास जनतेचा रोष कधीही रस्त्यावर उतरेल. कुटुंबाने आता न्यायालयात अर्ज दाखल करून इम्रान खान यांना तातडीने न्यायालयात हजर करण्याची मागणी केली आहे.
दरम्यान, गुप्तचर यंत्रणांनी अडियाल तुरुंगावर संभाव्य हल्ल्याचा इशारा दिल्यानंतर संपूर्ण परिसरात उच्च सुरक्षा लागू करण्यात आली आहे. इस्लामाबाद आणि पंजाब पोलिसांनी सुमारे २,५०० अतिरिक्त जवान तैनात केले असून तुरुंगाभोवती पाच नवीन तपासणी नाके उभारले आहेत. अधिकाऱ्यांनी या बहुस्तरीय सुरक्षा व्यवस्थेचा उद्देश ‘कुठलीही अनपेक्षित परिस्थिती’ टाळणे असल्याचं स्पष्ट केलं आहे.
