मुंबईतील कोस्टल रोडवरील बोगद्यात झालेल्या साखळी अपघातामुळे मोठी वाहतूक कोंडी निर्माण झाली असून, काही काळ संपूर्ण परिसरात गोंधळाचे वातावरण निर्माण झाले. प्राथमिक माहितीनुसार, बोगद्यात अनेक वाहनांची एकामागोमाग एक धडक झाली. या अपघातानंतर एका वाहनातून धूर निघत असल्याचे आणि आगीच्या ज्वाळा दिसल्याचे सांगितले जात आहे. त्यामुळे वाहनचालकांमध्ये भीतीचे वातावरण पसरले, तर सुरक्षिततेच्या दृष्टीने प्रशासनाने तातडीने वाहतूक थांबवली.
या घटनेमुळे विशेषतः नरीमन पॉईंटकडून कोस्टल रोडच्या दिशेने जाणारी वाहतूक बंद करण्यात आली असून वाहनचालकांना पर्यायी मार्गांचा वापर करण्याचे आवाहन करण्यात आले आहे. बोगद्यात मोठ्या संख्येने वाहने अडकल्याने अनेक चालकांना वाहनांसह बराच वेळ थांबावे लागले. काही वाहनचालकांनी परिस्थितीची पाहणी करण्यासाठी गाड्यांमधून बाहेर पडल्याचेही दिसून आले. घटनास्थळी अग्निशमन दल, पोलीस आणि आपत्कालीन पथके तातडीने दाखल होऊन परिस्थिती नियंत्रणात आणण्यासाठी प्रयत्न सुरू केले. दरम्यान, या घटनेचे व्हिडिओ सोशल मीडियावर वेगाने व्हायरल होत असून, अपघाताचे नेमके कारण शोधण्यासाठी संबंधित यंत्रणांकडून तपास सुरू आहे.
