कॉमेडियन समय रैना याच्या लोकप्रिय ‘इंडियाज गॉट लेटंट’ या शोच्या नव्या पर्वात एका मराठी अभिनेत्याने आपल्या दमदार अभिनयाने सर्वांचे लक्ष वेधून घेतले आहे. या कलाकाराचे नाव सुकृत देव असून त्याच्या सादरीकरणाची सध्या सोशल मीडियावर जोरदार चर्चा रंगली आहे. विशेष म्हणजे, त्याने साकारलेल्या दारूच्या नशेत असलेल्या व्यक्तीच्या भूमिकेने प्रेक्षकांसह परीक्षकांनाही अक्षरशः थक्क करून सोडले.
स्टेजवर येताच सुकृतने आपल्या अभिनयाची अशी छाप पाडली की उपस्थित अनेकांना तो खरोखरच मद्यधुंद अवस्थेत असल्याचा भास झाला. त्याची देहबोली, संवादफेक, चेहऱ्यावरील हावभाव आणि पात्रामध्ये पूर्णपणे रमून जाण्याची शैली यामुळे त्याचा परफॉर्मन्स अधिकच प्रभावी ठरला. काही क्षणांसाठी प्रेक्षक आणि परीक्षकही वास्तव आणि अभिनय यामधील फरक विसरून गेले होते.
मात्र, सादरीकरण संपल्यानंतर त्याने आपल्या मूळ आवाजात संवाद साधताच सर्वांना त्याच्या अभिनयातील बारकावे आणि कौशल्याची खरी जाणीव झाली. त्याच्या नैसर्गिक बोलण्याचा आवाज ऐकल्यानंतर उपस्थितांनी उभे राहून टाळ्यांच्या गजरात त्याचे कौतुक केले. अभिनेत्री आलिया भट्टसुद्धा त्याच्या अभिनयाने प्रभावित झाल्याचे पाहायला मिळाले. या क्षणानंतर सुकृत भावुक झाल्याचेही दिसून आले.
मराठी नाटक आणि दूरचित्रवाणी क्षेत्रात काम केलेल्या सुकृत देवसाठी हा मंच मोठा टर्निंग पॉइंट ठरत असल्याची चर्चा आहे. त्याच्या अभिनयाचे व्हिडिओ सध्या विविध सोशल मीडिया प्लॅटफॉर्मवर मोठ्या प्रमाणात व्हायरल होत असून प्रेक्षकांकडून त्याच्यावर कौतुकाचा वर्षाव होत आहे. एका प्रभावी अभिनयाने राष्ट्रीय स्तरावर ओळख निर्माण करणाऱ्या या मराठमोळ्या कलाकाराकडे आता मनोरंजन विश्वाचे लक्ष लागले आहे.
