छत्रपती शिवाजी महाराजांच्या ३५३ व्या शिवराज्याभिषेक दिनानिमित्त मनसे अध्यक्ष राज ठाकरे यांनी सोशल मीडियावर विशेष संदेश देत शिवरायांना अभिवादन केले. या ऐतिहासिक दिवसाचे महत्त्व अधोरेखित करताना त्यांनी शिवराज्याभिषेक दिन हा केवळ महाराष्ट्रापुरता मर्यादित न राहता संपूर्ण देशात राष्ट्रीय उत्सवासारखा साजरा व्हावा, अशी अपेक्षा व्यक्त केली.
राज ठाकरे यांनी आपल्या संदेशात नमूद केले की, ६ जून १६७४ रोजी झालेला शिवाजी महाराजांचा राज्याभिषेक हा स्वाभिमान, स्वातंत्र्य आणि स्वराज्याच्या विचारांचा ऐतिहासिक टप्पा होता. परकीय सत्तांच्या दीर्घकालीन प्रभावामुळे खचलेल्या समाजात नवचैतन्य निर्माण करून स्वराज्याची संकल्पना प्रत्यक्षात आणण्याचे कार्य शिवरायांनी केले. अल्पवयात घेतलेल्या स्वराज्याच्या निर्धारातून त्यांनी हिंदवी स्वराज्याची भक्कम पायाभरणी केली आणि भारतीय इतिहासात नवे पर्व सुरू केले.
यावेळी त्यांनी शिवराज्याभिषेकाच्या घटनेची तुलना जगातील महत्त्वाच्या ऐतिहासिक घटनांशी करत, या दिवसाने भारताच्या राजकीय आणि सामाजिक इतिहासाला नवी दिशा दिल्याचे सांगितले. तसेच, मराठी समाजाने हा दिवस केवळ उत्सव, मिरवणुका किंवा सजावटीपुरता मर्यादित न ठेवता शिवरायांच्या विचारांचे स्मरण करून त्यांचा आदर्श जीवनात उतरवावा, असे आवाहनही त्यांनी केले. अखेरीस त्यांनी छत्रपती शिवाजी महाराजांना मानाचा मुजरा अर्पण करत शिवराज्याभिषेक दिनाच्या शुभेच्छा दिल्या.
