महिन्याभरापूर्वीच ठरलं होतं लग्न, पण मनात होतं दुसरंच प्रेम; मुलाच्या कुटुंबीयांचा घातपाताचा संशय, पाचोरा पोलिसांत गुन्हा दाखल.
प्रेमप्रकरणातून टोकाचे पाऊल उचलत दोघा प्रेमी युगुलांनी एकत्र आयुष्य संपवण्याचा निर्णय घेतल्याची खळबळजनक घटना जळगावच्या पाचोरा परिसरात घडली आहे. पाचोऱ्याच्या गोराडखेडे रोडवरील एका लॉजमध्ये या दोघांनी गळफास घेतला. मात्र, या दरम्यान पंख्याचा फास तुटल्याने अल्पवयीन मुलगी सुदैवाने बचावली, तर २५ वर्षीय तरुणाचा रुग्णालयात उपचारापूर्वीच मृत्यू झाला. रवींद्र संजय मोरे (वय २५, रा. गिरड, ता. भडगाव) असे मृत तरुणाचे नाव आहे. या घटनेमुळे संपूर्ण जळगाव जिल्ह्यात कमालीची हळहळ व्यक्त होत आहे.
मिळालेल्या माहितीनुसार, मृत रवींद्र मोरे हा भडगाव तालुक्यातील गिरड गावचा रहिवासी होता. अवघ्या महिन्याभरापूर्वीच त्याचा विवाह ठरला होता आणि घरात लग्नकार्याची लगबग सुरू होती. काही दिवसांवर लग्न आले असतानाच, रवींद्रचे दुसऱ्या एका अल्पवयीन मुलीवर प्रेम होते. लग्न ठरल्यामुळे आणि प्रेयसीला सोडू शकत नसल्याने रवींद्र गेल्या काही दिवसांपासून प्रचंड मानसिक तणावाखाली होता, अशी प्राथमिक माहिती समोर येत आहे.
गुरुवारी सकाळी १० वाजताच्या सुमारास रवींद्र आणि त्याची अल्पवयीन प्रेयसी पाचोऱ्याच्या गोराडखेडे रोडवरील एका लॉजवर आले. त्यांनी तिथे एक खोली भाड्याने घेतली. खोलीत गेल्यानंतर दोघांनीही आपले आयुष्य संपवण्याचा अत्यंत टोकाचा निर्णय घेतला. त्यांनी खोलीतील छताच्या पंख्याला गळफास लावून घेतला. फास आवळला गेल्याने रवींद्रचा जागीच गुदमरून मृत्यू झाला. मात्र, त्याच वेळी मुलीच्या गळ्याचा फास अचानक तुटल्याने ती सुदैवाने बचावली.
आपल्या डोळ्यांदेखत प्रियकराचा झालेला अंत पाहून ती अल्पवयीन मुलगी प्रचंड हादरली आणि घाबरली. तिने तात्काळ खोलीबाहेर धाव घेत लॉजच्या कर्मचाऱ्यांना या घटनेची माहिती दिली. कर्मचाऱ्यांनी तात्काळ खोलीत धाव घेत रवींद्रला खाली उतरवले आणि तातडीने जवळच्या रुग्णालयात दाखल केले. मात्र, रुग्णालयात पोहोचण्यापूर्वीच त्याची प्राणज्योत मालवली होती. डॉक्टरांनी तपासून त्याला मृत घोषित केले
या घटनेची माहिती मिळताच रवींद्रच्या कुटुंबीयांनी रुग्णालयात आणि घटनास्थळी धाव घेतली. अचानक घडलेल्या या प्रकारामुळे कुटुंबावर दुःखाचा डोंगर कोसळला आहे. मात्र, रवींद्रच्या कुटुंबीयांनी या संपूर्ण घटनेवर तीव्र संशय व्यक्त केला आहे. “हा आत्महत्येचा प्रकार नसून घातपात असण्याची शक्यता आहे,” असा आरोप करत या प्रकरणाची पाचोरा पोलिसांनी कसून आणि सखोल चौकशी करावी, अशी मागणी कुटुंबीयांनी केली आहे.
पाचोरा पोलिसांनी याप्रकरणी सध्या अकस्मात मृत्यूची (ADR) नोंद केली असून मृतदेह शवविच्छेदनासाठी पाठवला आहे. या घटनेमुळे वाचलेली अल्पवयीन मुलगी प्रचंड मानसिक धक्क्यात असून ती कमालीची घाबरली आहे. तिने अद्याप पोलिसांना कोणतीही सविस्तर प्रतिक्रिया किंवा जबाब दिलेला नाही. या मुलीची मनःस्थिती सुधारल्यानंतर तिचा अधिकृत जबाब नोंदवला जाईल. त्यानंतरच या प्रकरणाची खरी आणि दुसरी बाजू समोर येईल, असे पोलीस सूत्रांनी सांगितले. पोलीस या प्रकरणाचा सर्व बाजूंनी तपास करत आहेत.
