उन्हाळ्याच्या कडक तापमानात शरीराला थंडावा देणारे पदार्थ खाण्याकडे अनेकांचा कल असतो. अशावेळी बाजारातील आईस्क्रीम किंवा थंड पेयांऐवजी घरच्या घरी तयार केलेली कोकम आईस कँडी हा एक उत्तम पर्याय ठरू शकतो. कोकमचा आंबट-गोड स्वाद, सब्जा बियांचा गारवा आणि मसाल्यांचा हलका तडका यामुळे ही आईस कँडी चवीला भन्नाट लागते. विशेष म्हणजे ही रेसिपी अगदी कमी वेळात आणि सहज तयार करता येते.
ही खास आईस कँडी तयार करण्यासाठी सर्वप्रथम एका मोठ्या भांड्यात पाणी घेऊन त्यात कोकम सिरप मिसळून घ्यावे. त्यानंतर त्यात साखर घालून ती पूर्णपणे विरघळेपर्यंत ढवळावे. मग चवीनुसार काळे मीठ आणि साधे मीठ टाकून मिश्रणाला हलकी चटपटीत चव द्यावी.
यानंतर भाजलेल्या जिऱ्याची पूड आणि चाट मसाला घालून मिश्रण अधिक स्वादिष्ट बनवावे. दुसरीकडे सब्जा बिया पाण्यात भिजवून काही वेळ फुगू द्याव्यात. साधारण तासाभरानंतर या सब्जा बिया कोकमच्या मिश्रणात मिसळाव्यात.
सर्व साहित्य व्यवस्थित एकत्र झाल्यानंतर तयार मिश्रण आईस्क्रीम मोल्डमध्ये भरून त्यावर झाकण लावावे. हे मोल्ड फ्रीजमध्ये 8 ते 10 तास ठेवून द्यावेत. मिश्रण पूर्ण गोठल्यानंतर थंडगार आणि चविष्ट कोकम आईस कँडी सर्व्ह करण्यासाठी तयार होते.
उन्हाळ्यात शरीराला थंडावा देण्यासाठी कोकम अतिशय फायदेशीर मानले जाते. त्यामुळे ही आईस कँडी केवळ चविष्टच नाही तर आरोग्यासाठीही उपयुक्त ठरते. घरच्या घरी बनणारी ही रंगीत आणि रिफ्रेशिंग रेसिपी मुलांनाही नक्कीच आवडेल.
