आई आणि मुलामधील नातं हे जगातील सर्वात जिव्हाळ्याचं आणि निस्वार्थी मानलं जातं. या नात्यातील प्रेम, माया आणि त्याग शब्दांत मांडणं कठीण असतं. अशाच एका हृदयस्पर्शी घटनेमुळे सध्या दक्षिण सिनेसृष्टीत चर्चा रंगली आहे. प्रसिद्ध अभिनेते डेनियल बालाजी यांच्या निधनानंतर त्यांच्या आईने घेतलेला निर्णय अनेकांच्या डोळ्यात पाणी आणणारा ठरत आहे.
२०२४ साली अवघ्या ४८ व्या वर्षी हृदयविकाराच्या झटक्याने डेनियल बालाजी यांचे निधन झाले. त्यांच्या अचानक जाण्यामुळे कुटुंबीयांवर मोठा आघात झाला. विशेषतः त्यांच्या आईला या दुःखातून सावरता आलेलं नाही. माध्यमांमध्ये आलेल्या वृत्तानुसार, डेनियल यांनी आपल्या आईसाठी तब्बल ८० कोटी रुपये खर्च करून एक आलिशान बंगला उभारला होता. त्या बंगल्यातच त्या राहत होत्या. मात्र, मुलाच्या निधनानंतर त्या घरातील प्रत्येक कोपरा त्यांची आठवण करून देत असल्याने त्यांना तेथे राहणं कठीण झालं. यामुळे त्यांनी एक मोठा आणि भावनिक निर्णय घेतला. त्यांनी तो आलिशान बंगला सोडून दिला आणि आपल्या मुलाने उभारलेल्या मंदिराजवळ एका साध्या झोपडीत राहण्यास सुरुवात केली. हा निर्णय त्यांच्या मुलावरील अपार प्रेम आणि त्याच्या जाण्याने झालेल्या वेदनेची जाणीव करून देतो.
डेनियल बालाजी यांनी तमिळ आणि मल्याळम चित्रपटसृष्टीत खलनायकाच्या भूमिकांमधून वेगळी ओळख निर्माण केली होती. ‘एप्रिल मथथिल’, ‘वेट्टैयाडु विलैयाडु’, ‘पोल्लाधवन’ आणि ‘वाडा चेन्नई’ यांसारख्या चित्रपटांमधील त्यांच्या भूमिका आजही प्रेक्षकांच्या स्मरणात आहेत. त्यांच्या अभिनयामुळे ते दिग्दर्शकांची पहिली पसंती बनले होते. त्यांच्या अकाली निधनाने चित्रपटसृष्टीने एक दमदार कलाकार गमावला, तर एका आईने तिचं सर्वस्व गमावलं.
