हिंदू आणि कोडाव पद्धतीने बांधली लग्नगाठ; ‘VIROSH’ च्या संसाराला दिमाखात सुरुवात
दाक्षिणात्य चित्रपटसृष्टीतील सर्वांत लाडकी जोडी, रश्मिका मंदाना आणि विजय देवरकोंडा यांनी आज आपल्या नव्या आयुष्याची सुरुवात केली आहे. उदयपूरमधील निसर्गरम्य अरावली पर्वत रांगांमधील आयटीसी हॉटेलमध्ये आज सकाळी १०.१० वाजता हिंदू वैदिक परंपरेनुसार या जोडीने लग्नगाठ बांधली. ‘गीता गोविंदम’च्या सेटवर सुरू झालेली ही प्रेमकहाणी आज लग्नाच्या बेडीत रूपांतरित झाली आहे. विशेष म्हणजे, दुपारी ४.३० वाजता रश्मिकाच्या मूळ ‘कोडाव’ परंपरेनुसार पुन्हा एकदा विधी पार पडणार आहेत. लग्नाचे फोटो अद्याप गुपित असले तरी सोशल मीडियावर त्यांच्या हळद आणि मेहंदीच्या फोटोंनी धुमाकूळ घातला आहे.
या लग्नसोहळ्याला देवरकोंडा आणि मंदाना कुटुंबातील मोजकेच सदस्य उपस्थित होते. विजयचे वडील गोवर्धन राव, जे दाक्षिणात्य सिनेसृष्टीतील मोठे नाव आहेत, आणि आई माधवी यांनी ‘VIROSH’ (विजय आणि रश्मिका) च्या लग्नासाठी जय्यत तयारी केली होती. विजयचा भाऊ आनंद देवरकोंडा यानेही आपल्या वहिनीचे स्वागत मोठ्या उत्साहात केले. गेले अनेक वर्षे आपल्या नात्याबद्दल गुप्तता पाळणाऱ्या या जोडीने अखेर चाहत्यांची प्रतीक्षा संपवली असून, सिनेसृष्टीतून त्यांच्यावर शुभेच्छांचा वर्षाव होत आहे.
