पावसाळ्याच्या दिवसांमध्ये गरमागरम आणि पौष्टिक पदार्थांची इच्छा अनेकांना होते. अशा वेळी चव आणि आरोग्याचा उत्तम संगम असलेले लेमन-कोथिंबीर सूप हा एक उत्कृष्ट पर्याय ठरू शकतो. कोथिंबीर, लसूण, काळीमिरी आणि लिंबाचा रस यांसारख्या पोषक घटकांनी तयार होणारे हे सूप केवळ चवदारच नाही, तर शरीराला उबदारपणा देण्यास आणि रोगप्रतिकारक शक्ती मजबूत करण्यासही मदत करते. विशेष म्हणजे हे सूप अतिशय कमी वेळात आणि सहज उपलब्ध साहित्यामधून तयार करता येते.
हे सूप तयार करण्यासाठी सर्वप्रथम ताजी कोथिंबीर स्वच्छ धुवून घ्यावी. कोवळ्या देठांसह अर्धी कोथिंबीर मिक्सरमध्ये थोडे पाणी घालून बारीक वाटून घ्यावी. त्यानंतर एका पॅनमध्ये तेल गरम करून त्यात ठेचलेला लसूण मंद आचेवर परतावा. लसूण हलका सोनेरी झाल्यानंतर त्यात हिंग आणि बारीक चिरलेली हिरवी मिरची घालून काही सेकंद परतावे. पुढे तयार केलेली कोथिंबिरीची पेस्ट घालून ती एक ते दोन मिनिटे चांगली परतल्यास सूपचा सुगंध अधिक खुलतो. त्यानंतर त्यात तीन कप पाणी घालून मिश्रणाला उकळी आणावी.
सूप उकळल्यानंतर त्यात उरलेली बारीक चिरलेली कोथिंबीर, काळीमिरी पावडर आणि चवीनुसार मीठ घालून आणखी काही मिनिटे शिजवावे. शेवटी गॅस बंद करून त्यात लिंबाचा रस मिसळावा. तयार झालेले गरमागरम लेमन-कोथिंबीर सूप केवळ थंडी आणि पावसाळ्यात शरीराला आराम देत नाही, तर हलका आणि पौष्टिक आहार म्हणूनही उत्तम पर्याय ठरते.
