भुवीची अवघ्या ५ धावांत ३ बळी घेणारी घातक गोलंदाजी; केएल राहुलची संधी हुकली, तर १५ वर्षांच्या वैभव सूर्यवंशीचा टॉप ३ मध्ये धमाका
आयपीएल २०२६ च्या १९ व्या हंगामात रॉयल चॅलेंजर्स बंगळुरूने (RCB) दिल्ली कॅपिटल्सविरुद्ध ऐतिहासिक विजयाची नोंद केली आहे. अरुण जेटली स्टेडियमवर पार पडलेल्या या सामन्यात आरसीबीने दिल्लीचे ७६ धावांचे माफक आव्हान केवळ ८१ चेंडू राखून पूर्ण केले. चेंडूंच्या बाबतीत हा आरसीबीचा आयपीएल इतिहासातील दुसरा सर्वात मोठा विजय ठरला आहे. या विजयासह आरसीबीने यंदाच्या मोसमातील आपला सहावा विजय साजरा केला आहे. या एकाच सामन्यानंतर ऑरेंज आणि पर्पल कॅपच्या शर्यतीत मोठे फेरबदल झाले असून वेगवान गोलंदाज भुवनेश्वर कुमारने आता पर्पल कॅपवर कब्जा मिळवला आहे.
आरसीबीचा अनुभवी वेगवान गोलंदाज भुवनेश्वर कुमारने दिल्लीविरुद्धच्या सामन्यात आपल्या गोलंदाजीने कहर केला. त्याने केवळ ३ ओव्हर टाकताना अवघ्या ५ धावा देऊन ३ महत्त्वाचे बळी टिपले. भुवीने आता ८ सामन्यांत एकूण १४ विकेट्स घेतल्या आहेत. विशेष म्हणजे अंशुल कंबोज आणि एशान मलिंगा यांच्याकडेही प्रत्येकी १४ विकेट्स आहेत, मात्र ७.६१ या अत्यंत कमी इकॉनमी रेटमुळे भुवीने या शर्यतीत बाजी मारली आहे. सध्याच्या फटकेबाजीच्या युगात भुवीचा हा इकॉनमी रेट थक्क करणारा आहे.
फलंदाजीच्या क्षेत्रात सनरायझर्स हैदराबादचा सलामीवीर अभिषेक शर्मा ३८० धावांसह पहिल्या स्थानावर विराजमान आहे. दिल्लीच्या केएल राहुलकडे आरसीबीविरुद्ध केवळ २३ धावा करून अभिषेकला मागे टाकण्याची संधी होती, परंतु तो अवघ्या १ धावेवर बाद झाल्याने ही संधी हुकली. सध्या केएल राहुल ३५८ धावांसह दुसऱ्या क्रमांकावर आहे. या यादीत १५ वर्षीय तरुण खेळाडू वैभव सूर्यवंशी ३५७ धावांसह तिसऱ्या क्रमांकावर असून त्याने सर्वांचे लक्ष वेधले आहे. तसेच, दिल्लीविरुद्ध नाबाद २३ धावांच्या खेळीनंतर विराट कोहलीने ३५१ धावांसह पुन्हा एकदा टॉप ५ फलंदाजांमध्ये स्थान मिळवले आहे. तर हेन्रिक क्लासेन ३४९ धावांसह पाचव्या स्थानावर असून ‘ऑरेंज कॅप’ची लढाई आता अधिकच रंजक झाली आहे.
