या वर्षातील सर्वाधिक धोकादायक मानल्या जाणाऱ्या ‘बावी’ चक्रीवादळाने चीनच्या पूर्व किनारपट्टीवर जोरदार धडक दिल्याने मोठ्या प्रमाणावर नुकसान झाले आहे. शनिवारी रात्री सुमारे 144 किलोमीटर प्रतितास वेगाने हे वादळ झेजियांग प्रांतात पोहोचले. त्यानंतर अनेक भागांत मुसळधार पाऊस, वेगवान वारे, पूर आणि भूस्खलनाच्या घटना घडल्याने जनजीवन विस्कळीत झाले. संभाव्य धोका लक्षात घेऊन चीन प्रशासनाने मोठ्या प्रमाणावर खबरदारी घेत झेजियांग, शांघाय आणि फुझियानसह विविध भागांतून सुमारे 20 लाख नागरिकांना सुरक्षित स्थळी हलवले. या नैसर्गिक संकटामुळे वाहतूक व्यवस्थेवरही मोठा परिणाम झाला असून 650 हून अधिक विमान उड्डाणे रद्द करण्यात आली आहेत. तसेच अनेक शाळा, महाविद्यालये आणि हाय-स्पीड रेल्वे सेवा तात्पुरत्या बंद ठेवण्यात आल्या आहेत.
चीनमध्ये पोहोचण्यापूर्वी ‘बावी’ चक्रीवादळाने तैवानच्या उत्तर किनारपट्टीवरही जोरदार तडाखा दिला. मुसळधार पाऊस आणि प्रचंड वाऱ्यांमुळे अनेक ठिकाणी झाडे उन्मळून पडली, वीजखांब कोसळले आणि वीजपुरवठा विस्कळीत झाला. या घटनांमध्ये किमान 134 जण जखमी झाल्याची माहिती स्थानिक प्रशासनाने दिली आहे. आपत्कालीन यंत्रणा बचाव आणि मदतकार्य राबवत असून प्रभावित भागांतील परिस्थितीवर सातत्याने लक्ष ठेवले जात आहे. हवामान विभागाने नागरिकांना सतर्क राहण्याचे आवाहन केले असून पुढील काही काळ मुसळधार पाऊस आणि जोरदार वाऱ्यांचा धोका कायम राहण्याची शक्यता व्यक्त केली आहे.
