वाढत्या महागाईच्या काळात एलपीजी गॅस सिलेंडरच्या किंमती ग्राहकांच्या खिशाला चांगलीच झळ पोहोचवत आहेत. नुकतेच सरकारी तेल कंपन्यांनी व्यावसायिक गॅस सिलेंडरच्या दरांमध्ये कपात करून व्यावसायिक ग्राहकांना काहीसा दिलासा दिला असला, तरी सामान्य घरगुती ग्राहकांना अजूनही किंमती कमी होण्याची मोठी प्रतीक्षा आहे. अशातच, गॅस सिलेंडर हाताळताना ग्राहकांकडून अनेकदा निष्काळजीपणा होतो, ज्यामुळे सिलेंडर चोरीला जाण्याच्या किंवा हरवण्याच्या घटना घडतात. जर तुमच्याकडूनही गॅस सिलेंडर हरवला, तर तुमचे गॅस कनेक्शन रद्द होते का किंवा गॅस पुरवठा कायमचा थांबवला जातो का, याबद्दल गॅस कंपन्यांचे कडक नियम आहेत जे प्रत्येक ग्राहकाला माहित असणे अत्यंत आवश्यक आहे.
नियम आणि प्रक्रियेनुसार, गॅस सिलेंडर हरवला किंवा चोरीला गेला तरी ग्राहकाचे गॅस कनेक्शन कधीही रद्द केले जात नाही; मात्र नवीन सिलेंडर मिळवण्यासाठी ग्राहकाला कायदेशीर प्रक्रियेचा सामना करावा लागतो. सिलेंडर चोरीला गेल्यास सर्वात आधी ग्राहकाने जवळच्या पोलीस ठाण्यात जाऊन रीतसर तक्रार (FIR) नोंदवणे अनिवार्य आहे. ही तक्रार करताना गॅस पासबुकवर किंवा पावतीवर असलेला सिलेंडरचा ‘युनिक क्रमांक’ पोलिसांना देणे आवश्यक असते, जेणेकरून चोरीच्या सिलेंडरची ओळख पटवणे सोपे जाते. यानंतर पोलीस तक्रारीची (FIR) प्रत, मूळ नोंदणी प्रमाणपत्र (Original Subscription Voucher) आणि गॅस धारकाचे ओळखपत्र घेऊन संबंधित गॅस एजन्सीला या घटनेचा सविस्तर लेखी तपशील द्यावा लागतो.
सिलेंडर ही गॅस कंपनीची मालमत्ता असल्याने, ग्राहकाच्या निष्काळजीपणामुळे तो हरवल्यास गॅस कंपन्या ग्राहकाकडून मोठा दंड वसूल करतात. नियमांनुसार, सिलेंडर हरवल्यास ग्राहकाला १,००0 ते ३,००० रुपयांपर्यंतचा आर्थिक दंड किंवा सुरक्षा अनामत रक्कम (Security Deposit) गॅस एजन्सीकडे जमा करावी लागते; तसेच जर सिलेंडरसोबत गॅसचा ‘रेग्युलेटर’ देखील हरवला असेल, तर दंडाची ही रक्कम आणखी वाढू शकते. ग्राहकाने सर्व आवश्यक कागदपत्रे जमा केल्यानंतर गॅस एजन्सी त्यांची पूर्ण पडताळणी करते आणि दंड वसूल झाल्यानंतर एका निश्चित कालावधीत ग्राहकाला नवीन सिलेंडर व रेग्युलेटर सुपूर्द केला जातो. त्यामुळे आर्थिक भुर्दंड आणि मानसिक त्रास टाळण्यासाठी ग्राहकांनी गॅस सिलेंडर सुरक्षित जागी ठेवणे आणि त्याची काळजी घेणे अत्यंत गरजेचे आहे.
