ठाकरे गटातील बंडखोरीवर राऊतांनी मांडला पैशांचा हिशोब; शिंदे गट आणि भाजपवर डागली तोफ
ठाकरे गटातून सहा खासदारांनी केलेल्या बंडखोरीनंतर शिवसेना (उद्धव बाळासाहेब ठाकरे) पक्षाचे नेते आणि खासदार संजय राऊत यांनी प्रचंड संताप व्यक्त केला आहे. प्रसारमाध्यमांशी बोलताना राऊतांनी बंडखोर खासदारांवर तीव्र शब्दांत आगपाखड करत, हे खासदार केवळ आणि केवळ पैशांच्या हव्यासापोटीच फुटल्याचा गंभीर दावा केला. रोहित पवारांच्या वक्तव्याचा हवाला देत राऊतांनी या कथित व्यवहाराचा थेट हिशोबच जाहीर केला. त्यांच्या दाव्यानुसार, प्रत्येकी ८५ कोटी रुपयांचे हे डील असून, खासदारांना दिल्लीत १५ कोटी, जयपूर दौऱ्यापूर्वी १० कोटी आणि अंतर्गत वाद मिटवण्यासाठी अतिरिक्त २५ कोटी रुपये देण्यात आले आहेत. मंत्रिपदासाठी चाललेली मारामारी थांबवण्यासाठी ही मोठी रक्कम मोजली गेल्याचा आरोप त्यांनी केला.
याचवेळी राऊत यांनी मुख्यमंत्री एकनाथ शिंदे आणि भाजपवरही सडकून टीका केली. ‘केवळ नावात बाळासाहेब असून चालत नाही, विचार महत्त्वाचा असतो’ या शिंदेंच्या वक्तव्याचा समाचार घेताना राऊत म्हणाले की, प्रबोधनकार ठाकरे यांचे विचार सांगण्याचा अधिकार शिंदे गटाला नाही. पैशाच्या जोरावर गर्दी जमवून भाषणे ठोकली जात आहेत. “हा तर फक्त ट्रेलर आहे” या शिंदेंच्या विधानाचा उपरोधिक उल्लेख करत राऊतांनी त्यांना ‘बेईमान नेता’ संबोधिले आणि सत्ता गेल्यानंतर त्यांची अवस्था बिकट होईल, असा इशारा दिला. तसेच, भाजप सध्या केवळ शिवसेनेला त्रास देण्यासाठी या बंडखोरांचा वापर करत असून, गरज संपताच त्यांना उकिरड्यावर फेकले जाईल, असा टोला लगावत महाराष्ट्रातील जनता या गद्दारांना निवडणुकीत नक्कीच धडा शिकवेल, असा विश्वास त्यांनी व्यक्त केला.
