मुंबईतील पायधुणी परिसरात डोकाडिया कुटुंबातील चार सदस्यांच्या संशयास्पद मृत्यू प्रकरणात तपासादरम्यान महत्त्वाची माहिती समोर आली आहे. बिर्याणी आणि कलिंगड खाल्ल्यानंतर कुटुंबातील चौघांचा मृत्यू झाल्याने खळबळ उडाली होती. या प्रकरणात घरातून उंदीर पळवण्यासाठी वापरले जाणारे औषध जप्त करण्यात आले होते. मात्र तपासात या औषधामध्ये प्राणघातक मानले जाणारे झिंक फॉस्फाईट नसल्याचे निष्पन्न झाले आहे.
तपास यंत्रणांना सुरुवातीला संशय होता की घरात सापडलेल्या औषधामुळे विषबाधा झाली असावी. परंतु संबंधित औषध हे उंदीर मारण्यासाठी नसून फक्त त्यांना दूर ठेवण्यासाठी वापरले जात असल्याची माहिती समोर आली आहे. या औषधामध्ये तीव्र विषारी घटक नसल्यामुळे मृत्यूचे कारण म्हणून त्याची शक्यता कमी मानली जात आहे.
तज्ज्ञांच्या मते, कोणत्याही रासायनिक पदार्थाचा शरीरावर होणारा परिणाम त्याच्या प्रमाणावर अवलंबून असतो. अत्यल्प प्रमाणात काही रसायने शरीरात गेल्यास गंभीर परिणाम होत नाहीत. त्यामुळे घरात आढळलेल्या औषधातून मृत्यू घडण्याची शक्यता कमी असल्याचे प्राथमिक निरीक्षण व्यक्त करण्यात आले आहे.
यामुळे आता झिंक फॉस्फाईट किंवा इतर विषारी घटक नेमके कुठून आले, हा तपासाचा मुख्य मुद्दा बनला आहे. अन्नपदार्थ, पाणी किंवा इतर कोणत्या माध्यमातून विषारी पदार्थ शरीरात गेला का, याचा तपास सुरू आहे.
दरम्यान, पोलिस आणि संबंधित यंत्रणा या संपूर्ण प्रकरणाचा सखोल तपास करत असून डोकाडिया कुटुंबाच्या मृत्यूमागील नेमके कारण शोधण्यासाठी विविध अहवालांची प्रतीक्षा केली जात आहे. या घटनेमुळे परिसरात चिंतेचे वातावरण निर्माण झाले आहे.
