भाईंदर परिसरात सुरू असलेल्या दहिसर-भाईंदर लिंक रोड प्रकल्पादरम्यान शनिवारी दुपारी एक गंभीर अपघात घडला, ज्यामध्ये दोन कामगारांचा दुर्दैवी मृत्यू झाला. या घटनेमुळे बांधकाम प्रकल्पांमध्ये काम करणाऱ्या मजुरांच्या सुरक्षिततेबाबत पुन्हा एकदा चिंता व्यक्त केली जात आहे.
माहितीनुसार, भाईंदर पश्चिम भागात हा महत्त्वाचा रस्ते प्रकल्प एल अँड टी कंपनीमार्फत राबवला जात आहे. शनिवारी सुमारे दुपारी 12:30 वाजण्याच्या सुमारास काही कामगार क्रेनच्या सहाय्याने काम करत होते. त्याचवेळी अचानक तांत्रिक बिघाड झाल्याने अवजड क्रेन कोसळली आणि मोठी दुर्घटना घडली. या अपघातात रघुनाथ दास (38) आणि काना सिंग (45) हे दोन कामगार गंभीर जखमी झाले. त्यांना तातडीने उपचारासाठी हलवण्यात आले, मात्र उपचार सुरू होण्यापूर्वीच त्यांचा मृत्यू झाला. या घटनेत आणखी काही कामगार जखमी झाले असून त्यांच्यावर रुग्णालयात उपचार सुरू आहेत.
अपघातानंतर परिसरात तणावाचे वातावरण निर्माण झाले होते. माहिती मिळताच भाईंदर पोलिस ठाण्याचे वरिष्ठ पोलिस निरीक्षक जितेंद्र कांबळे घटनास्थळी दाखल झाले आणि त्यांनी परिस्थितीचा आढावा घेतला. या प्रकरणाचा सखोल तपास केला जात असून, निष्काळजीपणासाठी जबाबदार असणाऱ्यांवर गुन्हा दाखल केला जाईल, असे त्यांनी स्पष्ट केले.
दहिसर-भाईंदर लिंक रोडच्या कामादरम्यान घडलेली ही पहिली मोठी दुर्घटना असल्यामुळे प्रशासनाच्या सुरक्षाविषयक उपाययोजनांवर प्रश्न उपस्थित होत आहेत. कामगारांच्या जीविताची सुरक्षितता सुनिश्चित करण्यासाठी अधिक कडक नियम आणि देखरेख आवश्यक असल्याची मागणी आता जोर धरत आहे. भविष्यात अशा घटना टाळण्यासाठी योग्य ती खबरदारी घेणे अत्यंत गरजेचे असल्याचेही या घटनेतून स्पष्ट झाले आहे.
