‘द 50’ शोमध्ये सहभागाच्या चर्चांवर चहलचे स्पष्ट स्पष्टीकरण; सोशल मीडियावरील अटकळी फेटाळल्या
भारतीय क्रिकेट संघाचा फिरकीपटू युजवेंद्र चहल आणि त्याची पूर्व पत्नी, प्रसिद्ध डान्सर व सोशल मीडिया इन्फ्लुएन्सर धनश्री वर्मा हे दोघे एकाच रिअॅलिटी शोमध्ये सहभागी होणार असल्याच्या चर्चा सध्या जोरात होत्या. विशेषतः ‘द 50’ या आगामी रिअॅलिटी शोमध्ये दोघांचा ऑन-स्क्रीन री-युनियन होणार असल्याच्या अफवा सोशल मीडियावर मोठ्या प्रमाणात पसरल्या होत्या.
मात्र या सर्व चर्चांना आता स्वतः युजवेंद्र चहलने पूर्णविराम दिला आहे. आपल्या इंस्टाग्राम स्टोरीद्वारे चहलने स्पष्ट शब्दांत सांगितलं की, त्याचा कोणत्याही रिअॅलिटी शोशी कोणताही संबंध नाही. ‘द 50’ शोमध्ये सहभागी होण्याबाबत कोणतीही चर्चा, ऑफर किंवा कमिटमेंट झालेली नसल्याचंही त्याने ठामपणे नमूद केलं आहे.
“माझ्या रिअॅलिटी शोमधील सहभागाबाबत जे काही वृत्त पसरवलं जात आहे, त्यात कोणतंही तथ्य नाही. हे केवळ तर्कवितर्क आणि खोट्या बातम्या आहेत,” असं चहलने आपल्या निवेदनात म्हटलं आहे. तसेच, माध्यमे आणि सोशल मीडिया युजर्सनी कोणतीही माहिती शेअर करण्यापूर्वी तिची खातरजमा करावी, असं आवाहनही त्याने केलं आहे.
दरम्यान, या संपूर्ण प्रकरणावर धनश्री वर्माने अद्याप कोणतीही प्रतिक्रिया दिलेली नाही. तिच्याकडून अधिकृत भूमिका समोर आलेली नसली तरी ती सध्या आपल्या कामात व्यस्त असल्याचं बोललं जात आहे. ‘द 50’ या रिअॅलिटी शोचा प्रीमिअर 1 फेब्रुवारी रोजी होणार असून, प्रसिद्ध दिग्दर्शिका आणि कोरिओग्राफर फराह खान हा शो होस्ट करणार आहे. हा शो पारंपरिक भारतीय रिअॅलिटी कार्यक्रमांपेक्षा वेगळा असणार असल्याचा दावा फराह खानने केला आहे.
युजवेंद्र चहल आणि धनश्री वर्मा यांचा विवाह डिसेंबर 2020 मध्ये गुरुग्राम येथे झाला होता. कोविड काळात चहलने धनश्रीकडून नृत्याचे धडे घेत असताना त्यांची ओळख प्रेमात बदलली. मात्र, जून 2022 मध्ये दोघांनी वेगळं होण्याचा निर्णय घेतला आणि मार्च 2024 मध्ये त्यांचा कायदेशीर घटस्फोट झाला.
घटस्फोटानंतर चहल दुबईमध्ये आरजे महवाशसोबत चॅम्पियन्स ट्रॉफीचा अंतिम सामना पाहताना दिसल्याने त्यांच्या नात्याबाबत चर्चांना उधाण आलं होतं. मात्र आरजे महवाशने यावर स्पष्टीकरण देत आपण केवळ चांगले मित्र असल्याचं सांगितलं आहे. दुसरीकडे, धनश्री वर्मा ‘राईज अँड फॉल’ या रिअॅलिटी शोमध्ये सहभागी झाली होती, जिथे तिने आपल्या वैयक्तिक आयुष्यावर आणि विवाहाबाबत खुलेपणाने संवाद साधला होता.
