शरीर उबदार ठेवणारी आणि रोगप्रतिकारक शक्ती वाढवणारी हंगामी फळं
हिवाळ्याची चाहूल लागताच आहाराकडे विशेष लक्ष देणं आवश्यक ठरतं. थंड वातावरणात शरीराला उष्णता मिळावी आणि आजारांपासून संरक्षण व्हावं यासाठी उष्ण आणि हंगामी पदार्थ खाण्याचा सल्ला दिला जातो. याच ऋतूत मिळणारी काही फळं शरीरासाठी अत्यंत फायदेशीर ठरतात. ही फळं पोषणमूल्यांनी भरपूर असून त्यामध्ये जीवनसत्त्वे, खनिजे आणि अँटिऑक्सिडंट्स मुबलक प्रमाणात असतात. रोजच्या आहारात ही फळं घेतल्यास शरीर ताजंतवानं आणि ऊर्जावान राहण्यास मदत होते.
संत्रं (Orange):
आंबट-गोड चवीचं संत्रं हे हिवाळ्यात हमखास खाल्लं जाणारं फळ आहे. यामध्ये व्हिटॅमिन सी मोठ्या प्रमाणात असल्याने रोगप्रतिकारक शक्ती मजबूत होते आणि संसर्गाशी लढण्याची ताकद वाढते. संत्र्यामुळे फायबर, पोटॅशियम आणि फोलेटही मिळतं, ज्यामुळे एकूण आरोग्य सुधारण्यास मदत होते.
सीताफळ (Custard Apple):
सीताफळ हे हिवाळ्यातील अत्यंत पौष्टिक फळ मानलं जातं. यामध्ये व्हिटॅमिन बी6 भरपूर असतं, जे शरीराची प्रतिकारशक्ती वाढवण्यास मदत करतं. नैसर्गिक साखर आणि फायबरमुळे त्वरित ऊर्जा मिळते आणि शरीर दिवसभर सक्रिय राहते. तसेच शरीरातील लोहाची कमतरता भरून काढण्यासाठीही सीताफळ उपयुक्त ठरतं.
चिकू (Chikoo):
चिकू जरी वर्षभर उपलब्ध असलं, तरी हिवाळ्यात ते विशेष फायदेशीर मानलं जातं. हे फळ उष्ण असल्याने थंडीत शरीराला उब मिळते. चिकूमध्ये फायबर, व्हिटॅमिन सी, पोटॅशियम, लोह आणि मॅग्नेशियमसारखी पोषक तत्वं असतात, जी पचन आणि एकूण आरोग्यासाठी लाभदायक ठरतात.
पपई (Papaya):
पपई हे पोषणमूल्यांनी भरलेलं फळ असून हिवाळ्यात पचनक्रिया सुरळीत ठेवण्यासाठी उपयुक्त आहे. व्हिटॅमिन सी, फायबर, प्रथिने आणि पोटॅशियममुळे शरीराची प्रतिकारशक्ती वाढते. तसेच या ऋतूत त्वचा निरोगी ठेवण्यासाठी पपईचा आहारात समावेश करणं फायदेशीर ठरतं.
अंजीर (Anjeer):
हिवाळ्यात अंजीर खाणं शरीरासाठी विशेष लाभदायक आहे. अंजीरामध्ये फायबर, प्रथिने, कॅल्शियम, लोह, फॉस्फरस आणि बी-कॉम्प्लेक्स जीवनसत्त्वे असतात. हे फळ उष्ण असल्यामुळे थंडीत शरीराला उब देतं आणि ऊर्जा वाढवण्यास मदत करतं.
